Dropping fracasa pabao di Aruba a wordo stroba door di Guardacosta y Polis

ORANJESTAD (AAN): Tabata riba Dia di Pasco, cu Guardacosta di Caribe Hulandes a detecta den madruga un boto sospechoso ta moviendo cu velocidad halto rumbo pa Aruba. 

   Ora cu Guardacosta a detecta e boto aki, mesora nan a saca un speedboat special tipo Metal Shark pa asina mobiliza den e area di e boto aki cu e momento ey ta riba lama pabao di Arashi.

   E momento cu e Metal Shark a yega den e area, y a busca forma pa intercepta e boto aki, mesora nan a mira con e boto a aumenta velocidad y cuminza busca forma pa huy.

   Personal di Guardacosta tambe a sigui su tras y cada rato a trata na stop e boto, pero e capitan no tabata preocupa mes y ta djis sigui bay direccion zuid.

   Dado momento esnan abordo di Guardacosta a cuminza los tiro di advertencia pa purba stop e boto aki.  Finalmente esey a logra, y mesora personal di Metal Shark a gara e dos persona abordo, y a cuminza cu buskeda.

   Pero no a bin topa nada sospechoso den e boto aki.

   Polis a lanta vuelo cu nan Helicopter tambe, y unidadnan a bay controla na beach, pero no a mira nada den e anochi ey.

   Sinembargo ora cu solo a sali, durante un vuelo di patruyahe, e helicopter di Guardacosta y e helicopter di Polis a bin topa cu varios paki ta drief riba lama.  E barco Zr.Ms. Holland cu aworaki ta sosteniendo Guardacosta, a ser manda na e lugar, y a logra saca tur paki for di lama.

   Esaki a pone cu e dos hombernan cu tabata den e boto, di nacionalidad Dominicano y Venezolano, a wordo pasa pa Polis di Aruba.  E droga tambe a wordo confisca door di Polis di Aruba.

   E caso aki ta demostra con bon e cooperacion ta entre Guardacosta di Caribe Hulandes y Cuerpo Policial di Aruba.

   Lamentablemente ni Polis, y tampoco Guardacosta no a menciona ta kico e contenido di e pakinan aki ta, y tampoco con e peso ta.

   Guardacosta a splica cu nan lo sigui cu nan patruyahe pa vigila frontera maritimo di Aruba.  Pesey nan ta pidi tambe yudanza cu tur hende cu mira algo sospechoso na oriya di lama, pa yama sea 913, of bo por manda mensahe riba Whatsapp +5999 510-0913 pa asina cu bo yudanza por mantene lama rond di e isla mas safe.