Dos muher den un Nissan March a keda deteni  

ORANJESTAD (AAN): Manera DIARIO a mustra caba, un caso di joyriding cu a finalisa den Luxemburgstraat ora un Kia Rio a basha cura di cas abao, a finalisa den detencion di 3 hoben cu tabata den e auto ey.

   E mesun Diabierna anochi despues di e detencion di e tres hobennan sospecha di ladronicia di auto, oficialnan hudicial di Joyriding Team a tuma nota di un Nissan March color cora cu number A-59891 ta pasa den nan area.

   E auto aki a hala atencion mesora di e agentenan, y nan a actua pa mesora duna e auto un señal pa para.  Pero e persona tras di stuur a djis primi trot, y no a cumpli cu e ordo.  El a hisa velocidad pa aleha.

   Polisnan tambe a pone sirena y zwaailicht y bay su tras, y e persecusion a finalisa riba parkinglot di e flatnan na Bushiri Complex.  Polisnan a core baha y yega cerca, y den e auto tabata tin dos muher.  Nan a wordo obliga na baha y a boeinan.

   Posiblemente e Nissan March aki tabata e auto cu a worde usa pa yuda e tres hobennan di e Kia Rio horta huy for di e lugar di accident na Luxemburgstraat.

   Polisnan a rista e Nissan March y aki a bin topa varios atributo y tambe droga. Mesora e dos muhernan a wordo avisa cu nan ta deteni.  Cu Vehiculo di Transporte nan a wordo hiba pa Warda di Polis na Playa, unda Fiscal Auxiliar a duna ordo pa nan keda deteni.  E droga y atributonan a wordo confisca y entrega na Seccion Anti-Narcotica di Polis.

   Takelwagen mester a yega pa bay cu e Nissan March tambe, como cu el a ser confisca.