Discusion a pone pasahero habri porta y bula fo’i vehiculo

El a dal cabez basta duro

ORANJESTAD (AAN): Tabata Diasabra anochi alrededor di 9:20 pm, cu Central di Polis a ricibi informacion cu un accident a socede riba caminda di Noord pa Westpunt, na altura di Noord 71.  Mesora a dirigi patruya di Noord eynan.

   Ora cu Polis a yega, nan a bin topa cu un homber benta abao riba e parkinglot otro banda di caminda, esta na e establecimento di Tai Sheng Hardware.  Polis a bin compronde cu e homber aki a caba di bula for di un vehiculo cu ta moviendo, y debi na esey a dal su curpa malamente.  Pa colmo trafico moviendo su tras, mester a desvia pa nan no a dal of trapa riba dje.

   Polis a bay check e victima, y mesora nan a solicita pa Ambulance, mirando cu segun nan e homber lo a ricibi golpi na cabes.

   Tur esaki, lo tabata resultado di un problema aparentemente di pareha, unda e homber lo dicidi di bula for di auto vehiculo, y cay dal su cabes.  Ta investigando si acaso e homber tabatin algun drinks den curpa tambe ora cu el a dicidi na bula for di e vehiculo.

   Polis a tuma tur dato na e lugar, y Paramediconan a bay cu e homber rumbo pa Servicio di Emergencia na Hospital.