Destruccion di un Nissan March den un accident riba WVB Boulevard

ORANJESTAD (AAN): Diasabra marduga riba e Watty Vos Boulevard, riba e ruta entre Sabana Blanco pa Cumana,

net yegando na altura di Cmart, algo a pasa cu un auto compacto Nissan March color shisnishi cu number A-62943 cu ta den yega rotonde di Cumana.

   Tin e teoria cu e dama chauffeur na stuur kizas a pega soño, y pesey su auto a baha caminda, dal contra e acera halto banda pariba.  E momentum di impacto a pone e auto hala pa banda pabao di caminda, y dal contra un bloki di e separador di caminda, y a sigui move y bay bek den un scual y dal di tres biaha duro contra blokinan di separador mas panort, y aki su auto a bay halto subi e separador y a pasa dal contra e palo di luz kibrando esaki.

   Finalmente e auto a cay bek riba caminda, y mas panort a keda para como cu tanto e wielnan dilanti, y e as di wiel patras a kibra.  Henter e pida Boulevard aki pa como 150 meter a keda tur cu desperdicio di plastico di pieza di auto gespat tur caminda.

   E prome unidad di Polis cu a yega, a bin nota cu e chauffeur ta un dama kende ta mustra di ta herida.  Ambulance a wordo pidi pa bin presta asistencia.

   E chauffeur femenino a relata na Polis e storia, cu ta su stuurwiel a ‘lock’ di tal forma cu e no tabatin control mas riba su auto.  Pesey el a keda dal mescos cu un pinball mashin na banda di acera, te cu el a finaliza sin por move mas.  E daño na e parti di motor, transmission, struts y shocks y as di e auto ta extremo.

   E persona herida tabata keha di dolor na su braza robez, y dolor na su pianan.  Paramediconan a dicidi pa bay cu ne rumbo pa Servicio di Emergencia pa tratamento avanza.

   Na final ta un Takelwagen so por a hisa y bay cu e vehiculo aki, cu ta mustra di ta total-loss.