Dama herida despues di dal violentamente cu su auto contra troncon di kwihi

Bispo di Aña anochi na Camacuri

ORANJESTAD (AAN): Diadomingo anochi alrededor di 8:20 pm, Central di Polis a dirigi unidadnan di Polis di Playa rumbo pa caminda di Camacuri, pa un accident fuerte cu a caba di socede eynan.

   E prome unidad di Polis cu a yega den e area pazuid di unda antes tabata e veld di Club Caribe, a bin haya como 60 meter pabao di Motorworld un auto basta kibra banda pazuid di caminda.  Den dje tabatin un solo persona femenino, y di prome bista por mira cu e ta na tino, sinembargo ta basta herida.

   Esaki por deduci di e impacto fuerte cu e auto sedan Nissan Versa color marron cu number A-23936, pa motibo desconoci a baha banda drechi di caminda, y dal violentamente frontal riba un troncon di kwihi.  Debi na e momentum di e impacto, e auto a zwaai mas pazuid y finalisa bek despues di 180 grado cara pabao.  El a keda casi banda di e track di cana/jog cu tin cerca di cura di Aeropuerto.

   Demas unidadnan di Polis a yega, y Ambulans tambe.  A mira cu debi na e impacto, e dama a hala den e cabina di auto y a finalisa na un situacion dificil pa sake di eynan.  Asina a pidi Vehiculo di Rescate di Cuerpo di Bombero pa bin duna un man tambe.  Despues di esey, un vehiculo di autospuit tambe a yega.

   No tabata necesario pa corta e auto parti pafo, pero a djis ‘brace’ e portanan cu poder di musculo mes pa habrie lo mas cu por.  Paden a corta parti di e dashboard pa asina libera su pianan.  Pues na forma magistral a traha un plan logico, pa asina yuda saca e pianan di e dama di e auto.  Bomberonan a keda cuadra cu paramediconan riba e forma menos doloroso y ideal pa sak’e di eyden.  Finalmente a dicidi pa sake via e porta di pasahero mes dilanti.

    Na un forma di total coordinacion, e personalnan eybao a sa di saca e victima y pone mesora riba brancard, y bay cune den Ambulans, pa asina sali rumbo pa Servicio di Emergencia.

Ambulance a yega y despues di un rato Brandweer tambe, cu mester a yuda pa saca e dama na un manera cuidadoso for di e auto.

    Polis a manda busca Specialista di Trafico pa bin eynan pa atende e accident complica aki.  A manda busca team forensico di BFTO tambe pa asina yuda tuma midimento y saca potret di e lugar, y tambe di e auto cu a keda un total loss eybao.  Di e forma ey lo por saca afo e causa di baha caminda pa dal fuerte den e troncon di kwihi aki.