Dama cu a defende su mes di violencia domestico na final tabata esun cu a keda deteni

Debi cu el a defende su mes cu un forki

ORANJESTAD (AAN): Posiblemente muchanan a mira con nan padrastro a maltrata nan mama asina fuerte, te cu nan a core yama Polis pa pidi pa yudansa.

   E mama na dado momento lo a defende su mes, y a usa un forki pa hinca e homber.  Resultado di esaki ta cu e mama a keda deteni, y e homber a ser hiba Hospital.

   Tur cos a start Diadomingo algo despues di 8’or di anochi, cu a surgi un discusion fuerte cu a escala mesora den un violencia domestico entre un homber y un muhe na un apartamento na Montaña.

   E problema a bay completamente for di man na momento cu e dama a pasa man pa un forki y a hinca e homber cu esaki, lagand’e herida.

  Presencia di polis mesora a wordo pidi na e adres, na yegada enberdad polis a bin topa cu e homber herida y a pidi di biaha pa presencia di ambulance.

  Na yegada di ambulance nan a trata e homber na e lugar, y despues a transport'e pa hospital pa un tratamento medico mas avansa.  Como cu tin mucha cu a mira tur cos, a pidi pa presencia di Bureau Slachtofferhulp.

   Dos agente femenino a presenta pa asina por a detene e dama cu a hinca e homber y tambe tuma e yiu/nan over cu a presencia tur cos.  Team forensico di BFTO tambe a wordo poni na altura.

   Durante cu e dama tabata warda pa drenta den transportwagen por a scuche ta bisa cu e ta victima. E problema aki a pasa dilanti e yiunan, y nan ta testigo.