Criminalidad a baha pero nos tin como prioridad pa enfoca riba baha esaki bao di hobennan

Alto Comisario:

ORANJESTAD(AAN): Recientemente den un entrevista cu DIARIO, Alto Comisario di polis Ramon Arnhem a indica cu e cantidad di caso criminal a baha ultimo tempo.

“Tur caso ta un dimas, pero nos mester sa cu criminalidad na Aruba tambe ta baha”, segun Arnhem, kende a indica cu tabata tin menos caso di tiramento y hincamento, menos accidente fatal, menos caso di ladronicia den cas y menos atraco.

Sinembargo, e Alto Comisario a indica cu tin un aumento si den e casonan di ladronicia den auto.

El a wordo puntra tocante e aumento di casonan di criminalidad bao di hobennan y el a indica cu cuerpo policial tambe ta nota esaki e ta haye preocupante.

“Nos mester pone extra atencion riba esaki, pero ta importante tambe pa e mayornan paga tino pasobra e ambiente social rond di e mucha y hobennan ta hopi importante pa nan desaroyo”.

E grupo di amigonan tambe por hunga un rol importante, segun Arnhem.

E Alto Comisario a sigui bisa cu ta importante pa traha na un manera mas preventivo.

“Esaki ta e direccion den cual nos kier bay, pues nos tin cu traha hunto cu diferente partner pa haya un mihor bista riba e problema di nos hobennan”, segun Arnhem.

A puntra e Alto Comisario si polis ta traha hunto cu scolnan riba e problematica y el a bisa cu si.

El a indica cu e tin contacto cu scolnan pa bin cu un programa concreto pa atende cu esaki.

“Nos kier tuma pasonan concreto pa elimina criminalidad bao di nos hobennan”.

E ta un problema cu nos  tin como prioridad, segun Arnhem.