Comunidad y Polis mester traha hunto pa logra un fin di 2022 mas sigur

Alto Comisario Ramon Arnhem

ORANJESTAD (AAN): Alto Comisario di Aruba señor Ramon Arnhem a expresa su mensahe na comunidad di Aruba, pero un advertencia pa esnan cu tin menos bon intencion.   

Diadomingo atardi, Ministerio Publico y Cuerpo Policial a tene un conferencia di prensa relaciona cu casonan di asesinato cu a tuma lugar den un termino cortico di tempo.

Alto Comisario Ramon Arnhem a indica cu dos persona a perde nan bida door di uso di arma di candela y den su opinion ta hopi importante pa tur hende por compronde su mensahe.

Na prome lugar, señor Arnhem a expresa su palabranan di profundo condolencia y forza na famia y amigonan di e victimanan y e ta convivi cu nan den momentonan di dificil aki.

Dia 30 di November, pa 8:10 pm, un hoben di apenas 19 aña a wordo asesina y dia 3 di December, den area turistico di Noord, pa 1:25 am, un homber di 31 aña a wordo asesina. Ambos caso, cu armanan di candela.

Arnhem a bisa cu e ta compronde cu e casonan aki tin un impacto fuerte riba sentido di seguridad den comunidad. Pero e ta sigura cu su coleganan di KPA a haci un tremendo trabao. Den ambos caso, den menos di 1 ora a detene e sospechosonan.

Alto comisario kier informa comunidad riba dos punto:

-Casonan di e magnitud aki semper lo wordo investiga. Sospechosonan lo wordo deteni y entrega na Ministerio Publico pa wordo persigui hudicialmente. Esaki por nifica mas di 10 aña den prison.

-Esnan cu a mira of tin mas informacion relaciona cu e casonan aki, tuma contacto cu Polis riba e number 11141.

Arnhem ta urgi esnan cu tin armanan di candela, pa entrega e arma anonimamente na un di e containers asigna pa polis. E ta finaliza cu hunto nos por traha pa un fin di 2022 mas sigur.