Ciudadano haya morto riba caya cu golpi pisa na su cabez  

Posibel caso di homicidio na Madiki: --- ORANJESTAD (AAN): Den oranan di madruga net ora cu un unidad di Polis di Playa ta coriendo den area di Madiki,  nan atencion a wordo hala door di un ciudadano cu a manda señal pa nan.

   Polisnan a bin compronde di e ciudadano ey, cu un tiki mas eybanda tin un situacion sospechoso unda cu tin un homber benta abao banda di un Pickup.

   Esaki a socede pa 4:35 am, y ora cu Polis a yega cerca di e area cu tin banda di Las Caleñas, e oficialnan a bin haya un persona masculino benta abao y visiblemente tin hopi golpi na su cabez.  Alavez e persona ta keto y no ta moviendo mas, pues casi no ta reacciona na nada.

   Mesora Polisnan a notifica di e gravedad di e situacion, y a pidi urgencia pa Ambulans yega na e lugar.  Pero mas bien e persona no ta duna señal di bida mas.  E ora a solicita via Centro di Alarma pa manda un Docter eybao.

   Mientras tanto, Polisnan a seya full e area pa mantene e zona steril y a core pidi presencia di Recherche di Oranjestad, como tambe Departamento Forensico di BFTO pa bin documenta tur esaki.  Central di Polis na su turno a escala e gravedad, door di notifica autoridadnan mas halto, incluyendo Fiscal di Ministerio Publico.

   Vocero di Polis, Lito Lacle a confirma cu Slachtofferhulp tambe a yega na e area.  Casi un ora despues, Dr. Texier a yega y pa 5:35 am exactamente a constata morto di e persona masculino, pero no por a indica cu exactitud e causa di morto.

   Den e oranan ey, Polis no tabata na altura di e identidad di e victima pero Recherche a cuminza investiga tur dato pa asina haya sa mas di loke a pasa, y kico a causa e golpi y trauma fuerte na su cabez, esta si acaso e mes a cay, of e ta un crimen caminda e persona a bira victima di homicidio.

   Mas despues a haya informacion extraoficial cu e victima masculino ta di inicial F.A., sinembargo Ministerio Publico no a duna detaye exacto.

   Mainta a habri y keto bay Polisnan tabatin e area cera pa e investigacion.  Na famia di e fayecido, DIARIO ta extende palabranan di condolencia.