Choke frontal na Hooiberg a cobra bida di señora di 62 aña

Dialuna a conoce e di 13 morto den trafico

• Su auto a hala na banda robez y bay dal frontal den vehiculo 

ORANJESTAD (AAN): Dialuna mainta pa 11:30 am, yamadanan a cuminza drenta na Central di Polis cu un accident basta fuerte a caba di socede riba e caminda di Santa Cruz pa Playa, net na rand di pueblo di Hooiberg.

   E prome unidad di Polis di Santa Cruz cu a yega, riba e brug aki conoci como ‘Brug di Canashito’ na como 150 meter pariba di Maiky’s na Hooiberg.  A bin topa cu un auto compacto Hyundai Getz color cora cu number A-4615 a bay dal frontal riba un vehiculo SUV modelo GMC Acadia Denali color off-white cu number A-SISTO.

   Polis a core baha y nota cu ta un accident grave, y e situacion di e chauffeur femenino di e Hyundai ta hopi serio.  A mira cu e Hyundai a haya daño material extenso.

   Mesora a pidi pa Ambulance yega cu mas urgencia, y diferente unidad di Polis extra a yega pa cera caminda.

   En total dos Ambulance como tambe First Responder a presenta, y mesora a cuminza check e señal vital di e persona, y aki a hasta prepara infuus pa suministra remedi pa purba check si por haya reaccion..  Pero no obstante tur esfuerzo di personal di Ambulance, no a logra reaccion di e persona.  Ambulance e ora a pidi pa manda Docter eynan.

   Specialistanan di Trafico tambe a yega pa asina cuminza investiga.  Polis a cuminza tuma declaracion di e chauffeur di e GMC Acadia Denali, y demas testigonan.  Tabata bisto cu e Hyundai Getz a hala na banda robez di caminda, y a dal direct den e SUV cu tabata bin di direccion contrario.

   A manda busca team forensico di BFTO pa documenta e accident.  Personal di Forensys tambe a yega pa nan haci nan investigacion.  A nota diferente oficial halto di Polis eynan, incluyendo Hefe di Departamento di Trafico, tambe Altocomisario Ramon Arnhem tambe.  Personal di Bureau Slachtofferhulp tambe a yega.

   Docter Forensico di Polis, esta Dr. Voskuil a presenta y a constata morto di señora Sandra V.F.F. Growell, naci dia 4 December 1962 na Aruba, pues tin 62 aña di edad.

   E investigacion awor ta den man di Departamento di Trafico, pa purba determina pa ki motibo e Hyundai Getz a bay full na su man robez.

   Señora Growell asina a bira e di 13 morto den trafico pa 2024 na Aruba.  E ta un cifra cu a crece exponencialmente den ultimo simannan.

   Vocero di Polis, Liliana Rasmijn, a manda un mensahe pa tur automobilista, pa nan sigui reglanan y ley di trafico.  Por fabor den e ultimo luna aki di fiesta, evita di core bao influencia, y tambe no core cu smartphone den man.  Corda cu siman pasa mes, un total di 117 chauffeur a presenta dilanti Hues, como cu nan a ser gara cu smartphone den man tras di stuur.  Cada uno a haya 600 Florin di boet.

   Na famianan di e fayecido, DIARIO y tambe Cuerpo Policial ta extende su mas profundo palabra di condolencia.