Chauffeur a pega soño y kenter cu su auto riba Avenida Nelson Oduber

ORANJESTAD (AAN): Tabata Diadomingo mainta pa 11:00 am, cu Central di Polis a dirigi unidadnan rumbo pa Avenida Nelson Oduber,  pa check un auto cu a bolter.

   Riba e via di Avenida Nelson Oduber cu ta move di Palm Beach pa Playa, a bin haya un auto compacto Honda Fit cu a kenter mey-mey di e separado di e dos vianan.

   Ta trata aki di un Honda Fit color preto cu number A-44610, y a nota cu tin e chauffeur herida.  E chauffeur na prome instante a bisa polis cu el a pega soño, loke a pone baha caminda y bay bolter pariba di caminda.

   El a agrega cu e ta OK y no mester yudansa medico.  Sinembargo semper golpinan ta wordo sinti mas despues, y pesey di un rato el a informa Polis cu el a cuminsa sinti malo.  Pues toch Ambulance tabata necesario.

   Ambulance lamentablemente a tarda bastante, y finalmente na yegada a pone e chauffeur riba brancard, unda a mara su curpa completamente bon, y despues a worde hiba pa Servicio di Emergencia di Dr. Horacio Oduber Hospital, unda lo tin un miho control ariba dje.