Chauffeur a keda mal pega den accident grave na Savaneta

ORANJESTAD (AAN): Diabierna madruga alrededor di 2:00 am, bisiñanan a yama Polis pa raporta un accident basta serio

cu a socede riba caminda principal di Playa pa San Nicolas, un poco pariba di G&G Pizza na Savaneta, pues na altura di e caminda cu ta bay a Generaal Majoor de Bruynewijk.

   Posiblemente den e birada un tiki mas pabao, chauffeur di e auto compacto color berde a perde control riba su stuur, baha for di caminda y bay pega cu tur velocidad mey-mey di matanan di kwihi cu tin na banda.  Esey tabata djis un hipotesis, aunke ta Polis di Trafico lo duna e relato final.

   Yamadanan a cuminza drenta pa mustra cu e chauffeur ta pega.  Esey ta e motibo cu tanto Polis di San Nicolas, como tambe Vehiculo di Rescate di Cuerpo di Bombero, y tambe Ambulans a wordo manda eynan.

   Bomberonan a haya nan ta traha basta hopi pasobra e acceso na e chauffeur den e auto tur kibra ey, tabata dificil.  Pero Paramediconan tabata presente y tabata yuda e chauffeur cu medicamento pa dolor, y tambe keda check su signonan vital.  Polis a cera caminda pa asina por a haci e trabao

   Despues di basta trabao di kibra e auto, a saca e victima riba stretcher, pa finalmente pone den Ambulans y a opta pa bay cune mesora pa Hospital di Aruba pa tratamento medico.

   Como cu e auto no ta riba tereno publico, y no ta stroba fluho di trafico, a prefera di laga e vehiculo eynan pa na final e doño mes dicidi ta cua Takelwagen e lo busca pa sak’e di eyden.  Pues riba henter Diabierna den dia, e tabata forma un sorto di ‘atraccion turistico’ tambe.