Chauffeur a bira malo ora di a mira su auto na candela

Atrobe otro Hyundai Getz a kima

ORANJESTAD (AAN): Diaranson anochi alrededor di 8:00 pm, yamadanan a cuminsa drenta tanto na Centro di Alarma como tambe Central di Polis, pa indica cu riba WVB Boulevard na altura di Moises de Marchena & Sons y FedEx, poco prome cu Archivo Nacional Aruba tin un auto na candela.

   Polis di Playa a sali rumbo pa eynan, y unidad di Bombero tambe a bay na e lugar. 

   Brandweer a yega y berdad a topa cu un auto Hyundai Getz cu number A-23442 na candela.  Nan a observa cu e candela a start dilanti, pues bao di hood, y a sigui expande y despues destrui mayoria di e auto.

   Doño di e auto cu ta un dama, a logra baha prome cu e candela a expande.  Pero eynan para, y mirando loke tabata pasando cu e auto, a pone cu el a bira malo.  Polis a nota esaki, y pesey a pidi pa manda Ambulans tambe.

   Presencia di ambulance tabata necesario, debi cu e muhe posiblemente lo ta un pashent di curason, y a cay flauw. 

   E candela a worde domina, pero lamentablemente e vehiculo no ta sirbi pa nada mas.

   Paramediconan cu a yega a bay atende cu e dama, pero despues di bastante rato cu a papia cu ne y a control’e, toch e no tabata desea di bay Hospital pa un extra control.

   Kico exacto ta e causa di e candela aki, no ta conoci.  Pero en general e autonan Hyundai Getz desde 2011 no ta wordo fabrica mas, pues e auto cu a kima aki ta minimo 13 aña bieu.  Den historia ta hopi Hyundai Getz a kima, debi na defecto cu e Modulo-ABS instala bao di hood.  E waya di ground ta frusta, y cualkier awa of likido di brake fuel cu lek riba dje, por ocasiona un candela.  Es mas te cu recien ainda Hyundai tabatin problema cu e Modulo-ABS instala riba otro autonan cu tabata keda faya y ta cuminsa kima inespera.

   Diahuebs den dia por a nota cu e auto kima a keda laga atras banda di caminda, sirbiendo como un “atraccion turistico” innecesario.