Caso di Hit & Run a cobra bida di turista Mericano

Accident grave na Savaneta

• E di ocho morto den trafico pa 2023
• Aresto di e chauffeur te na su cas na Tamarijn

ORANJESTAD (AAN): Diabierna anochi por a nota cu trafico rond di e isla tabata basta druk.  Cayanan cu normalmente ta liber sin congestion tur Diabierna anochi, na un forma peculiar tabata hopi druk.

   E anochi aki tambe, un pareha di edad grandi tabata canando riba acera na banda panort di Green Corridor pasando door di Savaneta.  Diripiente net como 35 meter pariba di e cruzada T-weg chikito cu tin pa por drenta negoshi di Citgo Savaneta, un auto pa un motibo of otro a dal e pareha peaton aki, y a sigui core, lagando e personanan aki seriamente herida.

   Inmediatamente yamadanan a cuminza drenta pa 7:11 pm na Central di Polis, y mesora a manda un unidad di Polis di San Nicolas pa e lugar.  E prome unidad cu a yega a bin topa cu un situacion grave eybao, cu algun ciudadano tratando di yuda dos herido.  Mesora nan a notifica e agentenan cu uno di nan ta mas grave cu e otro, y pesey Polis a core pidi pa presencia urgente di Ambulans.

   Auto a core bay: E auto mes a sigui core bay, pues a core notifica Specialista di Trafico tambe pa bin check e situacion.  Mas unidad di Polis a yega, y nan a cera e caminda aki for di e cruzada banda di Citgo Savaneta te na Do It Center Savaneta.

   Ambulans a yega na e lugar, y a cuminza atende esun mas grave, cu ta e peaton masculino.  A nota cu e ta un turista, y mientras tanto un otro Ambulans a yega pa atende e peaton femenino.

   Paramediconan a nota cu e turista masculino ta den situacion critico, y ora cu a stabilisa su curpa un tiki, a opta pa pone riba brancard y cu maximo urgencia a sali bay pabao rumbo pa Hospital.

  E otro turista femenino tambe a haya basta trauma na su curpa, incluyendo un kap cu tabata sangra profusamente na su cabes.  E tambe a wordo poni den e otro Ambulans y a sali cune rumbo pa Hospital.

  Specialista di Trafico a yega, y cu yudansa di Team Forensico di BFTO a cuminsa registra e area di accident.  Tabatin testigonan clave cu a yuda Polis cu detaye encuanto e vehiculo cu a sigui core despues di a dal e pareha peaton, kendenan tin apenas par di dia na Aruba y ta hospedando den e area.

   Polis di Trafico a cuminza investiga e pistanan aki, y a acudi na bario di Tamarijn te na Paradera, y aki a bin haya e auto kibra dilanti un cas.  Polisnan a aresta e chauffeur y a bay cune Warda di Polis, unda Fiscal Auxiliar a duna ordo pa e keda deteni pa investigacion.  Cu Takelwagen a confisca e auto kibra tambe den cuadro di investigacion.

   Noticia di fayecimento: Pero banda di 1:00 am, Central di Polis a wordo notifica door di Hospital, cu e turista masculino no a sobrevivi.  Un rato prome, Dr. Nommerman a constata morto di e turista Ali Biner di 75 aña naci na Merca.

   Esaki a escala e gravedad di e accident aki, y specialmente e peso cu a bira aun mas enorme riba schouder di e chauffeur cu a ocasiona e Hit & Run.  E acusacion contra dje a empeora, y e lo tin di bay aparece awor dilanti Hues cu lo dicidi kico su futuro lo ta.

   Vocero di Polis ta haci un suplica na comunidad, pa e dianan aki ban ta mas conciente y pone atencion den trafico y reduci velocidad.  Si bo tin di bay un Cena di Pasco, por fabor sali mas trempan pasobra bo ta garantisa di lo keda pega den congestion di trafico.

   Na famianan di e fayecido, DIARIO y Cuerpo Policial ta manda palabranan di condolencia.