Cantidad di stranhero indocumenta kier a drenta Aruba cu droga

ORANJESTAD (AAN): Un trabao sublime di coordinacion di Cuerpo Policial, hunto cu personal di Wardacosta di Caribe Hulandes, y funcionarionan di Radar-Kamer, Helicopter, Polis Maritimo, y varios oficial di Polis a eherce un trabao inespera, influencia pa un bon coordinacion, y resultado di esey ta cu 2 boto stranhero a wordo intercepta, cantidad di droga a keda confisca, y 23 persona indocumenta a keda deteni.

   Caso na Arashi:

   Ora cu tur hende a kere cu e prome dia di 2023 lo bay ta uno ordinario, hopi trempan riba Diadomingo e radarnan maritimo

potente a detecta algo ta moviendo y ta tratando di drenta y yega tera na e parti noordwest di Aruba, specificamente den area di Arashi.

   Na momento cu Radarkamer a detecta esaki, e comunicacion cu Central di Polis a socede na un nivel sumamente profesional, unda cada instancia tabata sa con pa actua, y asina a start un coordinacion cu sigur ta impulsa positivismo enorme den cuerponan di autoridad local.

   Como cu esaki ta parce di lo bira un ‘aanlanding’ grandi, mesora Central di Polis a manda delaster un unidad di Polis pa mobiliza pa area di Arashi, y esaki a inclui Patruyanan di Polis di Noord, Strandpolitie, Santa Cruz, Oranjestad, y demas autoridad cu tabata riba caya.

   Nan a mobiliza pa e area di Arashi cu un solo meta, esta pa purba impedi cu hendenan por subi tera y ‘desaparece’ den hendenan of areanan di bay sconde.

   Wardacosta di Caribe Hulandes tambe a saca nan speedboat di reaccion rapido, esta un Metalshark cu a mobiliza rumbo pa Arashi.

   Mientras tanto, e boto a yega tera, y aki nan a core baha cu bastante bulto cu lo ta droga, diferente jerrycan yena cu gasolin, y algun persona indocumenta cu ta simplemente tratando di drenta e isla ilegalmente.

   Despues e boto a subi lama bek, posiblemente tratando di huy.  Pero aki ta unda cu e Metalshark di Wardacosta a demostra di ta mas rapido, y a logra intercepta esaki.  Nan a ordena tur 2 persona abordo pa hisa man den halto, y asina a detene ambos, y confisca e boto ey.

  Helicopter di Polis tambe a bay halto pa yuda den e buskeda aki na Arashi.  Mientras tanto na tera, e tantisimo unidad di Polis cu a yega a drenta den accion pa core tras di e hendenan indocumenta, y a logra gara y wanta 6 persona.  Tambe a confisca tur jerrycan cu combustible, y e bultonan di droga.

   Caso na Savaneta:

   Na mesun momento cu esaki ta pasando na Arashi, e funcionarionan atento den Radarkamer a detecta otro boto un par miya pafor di Santo Largo, na parti zuidoost di Aruba.  Aki ta mirando cu e boto aki ta mik directo pa bay den direccion di e beach aki.

   Atrobe den un bon trabao combina cu Central di Polis, a cuminza coordina tambe pa diferente patruya di Polis di San Nicolas, y esnan riba caya pa mobiliza pa eynan.  E Helicopter di Polis tambe a desvia for di Arashi pa bay direccion di Santo Largo.

   E boto di Polis Maritimo tambe a bay den accion y a logra intercepta e boto aki. Abordo di e boto tabata tin 1 persona cu tambe tabata purba bay back direccion pazuid e momento ey den area cerca di Isla di Oro.  Pero el a wordo wanta, y a lastra e boto bin bek Aruba.

   A cuminsa coordina conhuntamente cu Helicopter di Polis, oficialnan di Wardacosta di Caribe Hulandes, e oficialnan di Guarda Nos Costa, Radarkamer y oficialnan di Polis procedente di diferente distrito cu a yega na Santo Largo pa duna un man.

   Mesora cu e prome 2 oficial di Polis canando na pia for di lama a drenta e mangelnan, nan a pidi refuerzo via Tetra-Radio di Polis, pasobra a bin topa cu mas di 10 hende indocumenta scondi den e mangelnan ey na Santo Largo.

   E Helicopter a baha na beach di Santo Largo, pa asina yuda transporta mas oficial di Polis, y tambe funcionarionan di Wardacosta pa drenta e mangelnan for di e banda di lama.  Polisnan a baha for di boto di Polis Maritimo mes, cu uniform bisti keto bay, pa asina rondona e grupo di indocumenta.

   Di e forma ey, nan a bin pone man riba en total 14 persona indocumenta na Santo Largo.  Ta trata di 13 homber, y 1 muher.

   Accion hopi fructifero:

   Sin duda algun, e dos accion simultaneo aki di Polis ta manda un mensahe cla y raspa!  Aruba tin suficiente Polis pa blokea un entrada ilegal na mesun momento!  Pues el a duna un tremendo resultado ariba e prome dia di Januari 2023.

   E botonan a wordo intercepta door di coleganan di Kustwacht cu a drenta na Arashi. Aki a detene en total 6 persona y confisca un cantidad basta considerabel di droga.

   Cu e boto intercepta door di Polisnan Maritimo na Isla di Oro a detene en total 15 persona y rugtasnan confisca pa determina ainda precies kico tin aden.

   Trahando den ekipo y cu un bon coordinacion, tras di pantaya, riba tera, den aire y riba lama nos por bisa cu e resultado di e accion tabata un exito y asina frena baho mundo den 2023.

   E capitannan di e botonan aki sigur ta bay wordo acusa di Traficacion Humano.  Tambe ta trata na haya sa, na kende e droga aki tabata destina.