Candela den cas a causa morto di Fanfa Sanchez

Ta investigando si acaso ta crimen of no - ORANJESTAD (AAN): Diahuebs mainta algo prome cu 11:30 am, a drenta notificacion na Polis cu tin un candela, y hendenan a haya un persona sin bida, y su curpa ta kima tambe.

   Mesora Polis como tambe Cuerpo di Bombero a acudi na Brikstraat den e area meymey cu Timonstraat, cu ta e caya pabao di Venezuelastraat cu ta drenta Madiki.

   A yega y a bin nota cu e bisiñanan eybanda mes a usa un slang di awa pa paga e candela.  Y paden tabatin un persona cu ta basta kima, y cu no ta duna señal di bida.

   Mesora Polis a seya e area, y a notifica demas autoridadnan, incluyendo oficialnan hudicial cu a yega hunto cu personal forensico di BFTO.  Esaki ta pa haya sa si acaso ta un accident a socede, of ta algo criminal a keda registra.

   E victima mes a wordo identifica como Francisco Aquiles Sanchez, mihor conoci como Fanfa Sanchez, di 76 aña di edad, naci dia 3 di december 1944.  E tabata un persona cu den pasado tabata papia na emisora di Voz di Aruba tambe.

   Kizas e ta un crimen?  Pasobra Fanfa a caba di cobra su placa di pensiun riba Diahuebs mainta mes.

   Pesey mes Recherche tin di investiga tur esaki, y tende testigonan.  Cualkier hende cu informacion, por duna esaki na Tipline di Polis na 111-41.

   Na final, personal di Funeraria a keda encarga pa transporta e restonan mortal.

   Na famia di e fayecido, DIARIO ta extende su mas profundo palabra di condolencia.  Cu Fanfa sosega na paz.