Bululu na supermarket ora turistanan no kier drenta cu tapaboca y bisti cu djis bikini top

ORANJESTAD (AAN): Bisti cu djis bikini top, sin tapaboca, y sin garoshi, riba Diahuebs atardi un grupo di turista kier a drenta Supermarket

sin preocupa cu reglanan cu keto bay ta vigente na e establecimento.  Security na entrada corectamente a informa nan cu nan no por drenta y a blokea nan sin mishi cu nan.

   Pero nan a forza toch pa drenta, y aki ta unda cu un di e turistanan aki dal e security un cant’i man lage cu un rasca mahos na su cara.  Y asina a bay paden.  E otro turista dado momento tambe a cuminza haci beheid paden, y a scupi un empleado tambe den su cara.  Aki ta unda cu hendenan a ripara cu nan ta parce di ta visiblemente bao influencia di alcohol of algo otro.

   Aki ta unda cu e turistanan a cuminza actua comosifuera nan ta victima, y a cuminza pidi yudanza di demas amigonan cu tambe ta haciendo compras.  Uno di nan ta un turista masculino cu a busca tur forma pa confronta e Security Guard, aunke esaki ya caba a bay na di dos piso na oficina.

   Mientras tanto e situacion a bira uno di bululu, y pa suerte un agente policial na civil cu a mira tur cos a pone autoridad na altura.  Y den un frega di wowo, no menos cu 5 unidad di Polis, incluyendo unidad motoriza a yega.  Pero e muher turista a bay di e lugar.  Diripiente el a regresa aun mas furioso y ta pidi pa topa cu e Security Guard.  Aki nan a mustra e turista pa e bay papia cu e Polisnan riba Parkinglot.  E turista femenino a bay habri boca duro contra autoridadnan, y no tabata razona cu ningun hende.

   Na final Polis a detene e muher, y tambe un otro persona femenino pa asina nan calma y bay Warda di Polis cu nan.  E otro dos turistanan masculino a ser laga liber, pasobra aunke nan tabata busca forma pa bay regla cuenta cu e Security, nan no a logra, pues no a comete nada contra regla.