Boksmento entre 3 auto a laga un persona herida

ORANJESTAD (AAN): Tabata den oranan di atardi, cu Central di Polis a ricibi yamada di ciudadanonan na Savaneta,

splicando cu den area di Winter Garden Supermarket a scucha y presencia un accidente basta serio.

   Mesora Central di Polis a manda patruyanan di San Nicolas pa e area pa check kico a socede.

   A sali na cla cu un chauffeur masculino na stuur di un Nissan Quest color shinishi, a bay na su man robes y dal contra un Dump truck pa despues dal contra un Toyota Yaris. No ta mucho claro si acaso e persona aki na stuur di e Nissan lo por a bira malo, cu a pone perde control.

   Polis a cuminza atende mesora y a pidi presencia di Ambulance pa e chauffeur di e Nissan Quest.

   Debi na complehidad di e accident, a pidi Polis di Trafico pa atende e desgracia.  Paramediconan a dicidi cu ta bay hiba e persona rumbo pa Servicio di Emergencia na Hospital.  Takelwagen a worde pidi tambe pa move e vehiculonan kibra pa asina trafico por continua.