Autoridad a stop 200 auto den control
- Djis si bo tin smartphone den man teni ya bo ta haya boet
- Den siete ora a gara hopi hende violando Articulo 7A
ORANJESTAD (AAN): Riba Diaranson atardi pa anochi, Polisnan di distrito di Oranjestad a tene un control den trafico. E control a tuma lugar for di 4:00 pm te cu 11:00 pm, y a ser haci na Playa mes riba L.G. Smith Boulevard na altura di Oficina di Polis TOP y tambe banda di ex-Old Fisherman Restaurant.
Vocero di Polis, Liliana Rasmijn a confirma cu e control tabata enfoca mas riba maneha cu cellular of smartphone den man.
Polisnan di Oranjestad hunto cu personal di Unidad Motorisa a para mas o menos 200 auto y a reparti un total di 59 multa. Tres boet ta pa esnan coriendo sin safety-belt bisti. Dos boet pa esnan manehando motorcycle sin helm.
Pero esun mas espantoso, ta cu den siete ora di tempo nan a gara y multa un total di 54 automobilista cu tabata manehando cu smartphone den man. Esaki ta violacion di Articulo 7A di Ley di Trafico, pues esun cu ta manehando e auto, e djis tin un smartphone of mobil telefon den su man, e ta haya e boet aki.
Anto e boet ta bastante pica! E ta exactamente 500 Florin. Esnan cu nota di acuerdo, por bay dilanti Huez pa purba defende nan mes contra e multa. Pero corda cu dilanti Hues, Fiscal lo bay exigi pa e boet subi pa 600 Florin e ora!
Si bo ta uza un smartphone ora cu bo ta manehando un auto of vehiculo, ta crea potencial enorme pa morto y herido den trafico. Coriendo auto mientras bo mente ta distrai riba bo smartphone ta papia of ta lesando message di WhatsApp, ta kita tur bo atencion for di e tarea di maneha auto na forma safe.
E distraccion di mas grandi ta di lesa of skirbi texto riba WhatsApp. Pa bo manda un texto, bo wowo ta desvia di caretera pa 5 seconde. Si bo ta coriendo 90 km/h, esey ta comosifuera bo a core henter un largura di veld di futbol cu bo wowonan cera.
Bo no por core na forma safe, tanten cu stuurmento tin bo atencion completo. Cualkier actividad cu bo smartphone, ta un distraccion y ta aumenta bo riesgo di hayabo den un accident.
E bon noticia ta cu tin hopi hende cu ta baha di caminda, stop nan auto pa asina lesa of responde cualkier yamada of texto importante cu nan ta ricibiendo. Ohala mas hende haci esey.
E 54 personanan cu a haya boet, e suma di paga lo ta 500 Florin. Si acaso nan tur haci pago, e suma di placa cu ta drenta den caha eynan ta 27.000 Florin.
Cuerpo Policial ta keda enfoca riba e seguridad den tradfico y lo keda haci e controlnan aki.
