Autoridad cu dos razzia simultaneo pa desmantela supuesto Casinonan ilegal riba e isla

ORANJESTAD (AAN): Despues di un investigacion basa riba varios tip, riba Diaranson anochi laat a tene razzia simultaneo riba dos lugar den area di Playa.  E biaha aki ta supuesto Casino ilegal.

   Esaki a pone hende pensa riba un Casino ilegal cu tabatin antes tambe na San Nicolas pero cu a wordo elimina prome cu autoridad a haya sa di dje.

   E biaha aki, unidadnan di Polis hunto cu Recherche, y tambe RST a aglomera den Avenida Milio Croes 51, pa check un hoki den e compleho comercial grandi di Dakota Shopping Paradise unda tabatin e supuesto Casino ilegal aki.  No a haya ningun hende hungando.

   Na mesun momento, autoridadnan hudicial a aglomera tambe na un lugar cu ta como 1 kilometer mas leu, esta na Sabana Blanco 70 cu ta edificio unda antes Tiara Air tabata situa, net banda di Watty Vos Boulevard, panort di Wayaca Service Station.

   Tur dos razzia tabatin haber cu Casino ilegal, y nan a bin topa cu varios mesa specializa pa Casino poni den e lugarnan aki tambe.  Fiscal a duna ordo pa confisca tur cos.

   LES DI POKER: For di prome reaccion caba, DIARIO a haya informacion cu hendenan ta haci uso di e lugarnan aki, “djis pa haya les con pa hunga Poker”.  Pesey e lugar tin mesa estilo Casino, pa wega di carta.

   Pero pa Ministerio Publico, e momento ey tabata esencial pa nan confisca tur loke nan por a haya, pa asina por analisa tur prueba, y tambe saca un conclusion basa riba e interogacionnan.

   E ta les di Poker of no, pero mester tin por lo menos un compania inscribi pa ta facilitador di lesnan asina.

   Pero si acaso ta un Casino ilegal e ta, aki ta unda cu Ministerio Publico lo usa tur informacion cu nan tin disponible, pa check si berdad ta wega di baho mundo ta tuma lugar mey-mey di poblacion asina.   Pa colmo tin indicacion cu ta algun stranhero ta envolvi den operacion di e Casinonan clandestino aki.

   Ademas di esey, si acaso di berdad e ta wordo maneha como un Casino unda tin ganashi, e ora ta mishi cu teritorio di Departamento di Impuesto DIMP tambe cu tabata presente durante e razzianan aki.  Aduana Aruba tambe tabatin funcionario cu a acompaña esnan cu a ehecuta e Entradanan Hudicial aki.