Auto cu a bolter riba Avenida Nelson Oduber pero ocupantenan a sali ileso

ORANJESTAD (AAN): Un doble accident a keda registra Diabierna anochi poco despues di 11:30 pm, riba caminda di Avenida Nelson Oduber for di Playa direccion Rotonde pariba di Hospital.

   Pa un motibo of otro, e chauffeur di un Hyundai Accent sedan color silver cu number A-63459 moviendo di Playa rumbo pa Palm Beach, net yegando cerca di e rotonde, a bay den un scual, a baha caminda na su banda robez, y den e momentum cu e tabata slip riba yerba, el a bay dal den par di baranca grandi, y aki e auto a flip y finalisa cu su cuatro wielnan ainda den halto.

   Yamadanan a cuminsa drenta na Polis di e accident aki, y mesora Polisnan di Playa a ser manda eynan.

   Ora cu Polis a yega, a bay check e Hyundai Accent via e backshield, y a nota cu e personanan den dje no ta herida, pero si a pasa den susto.

   Otro dalmento eynan: E mesun momento ey, riba e via di Palm Beach rumbo pa Playa, un vehiculo Mitsubishi SUV color preto a baha velocidad pa kizas mira e accident of lo por tin obheto riba caminda.  Un di e vehiculonan cu tabata bin su tras, esta un Nissan SUV color cora, e chauffeur kizas pa distraccion no a ripara cu e autonan su dilanti a stop.  Sin regla su velocidad, el a bay dal tras di un auto compacto.  E auto compacto na su turno a bay dilanti y dal tras di e Mitsubishi.

   Na e di dos dalmento aki tambe, daño material ta bastante.  Pero ningun hende a resulta herida.  Personal di Roadservice a presenta pa atende cu e accident.

   E Hyundai Accent cu a bolter, finalmente ta Takelwagen mester a yega pa asina kit’e di eybao.