Auto casi a bay finaliza den lama pazuid di Plaza Boy Ecury

ORANJESTAD (AAN): Hendenan cu tabata pasando riba Lloyd G. Smith Boulevard riba

Diamars mainta algo pasa di 10’or, net na e T-weg cu Madurostraat, pazuid di Plaza Boy Ecury a mira un situacion cu a pone nan den susto.

   Nan a mira con un auto compacto Honda Fit hatchback color blauw cu number A-17115 ta manera purba subi e acera di Linear Park banda pazuid di caminda.  Diripiente ta parce cu e auto a bay cu speed halto, subi e acera y envez di primi brake, ta parce comosifuera a keda primi trot, y asina e auto a pasa over, y cuminza baha e baranca, y a keda pega, faltando apenas algun centimeter pa el a cay den lama.

   Yamadanan a cuminza drenta na tanto Polis y tambe Cuerpo di Bombero.  Diferente patruya di Polis a yega, pasobra algun hende a realmente kere cu e auto a bay cay te den lama.  Un unidad di Bombero tambe a presenta.

   E prome patruya a bin topa cu e Honda Fit na rand di baranca parti abao.  E chauffeur masculino di e auto tabata OK, y no tabata mustra cu lo mester asistencia medico.

   Forensys tambe a yega pa atende e seccion di aseguro.  Ta mustra cu un posibel descuido a pone cu e auto a subi e pad y bay termina parcialmente den lama.

   Basta aña atras na e mesun lugar a sosode un incidente di e mes manera, pero e dia ey e chauffeur no a sobrevivi e impacto.