Auto a ranca palo di luz cu transformer lagando varios bario sin coriente

ORANJESTAD (AAN): Varios bario di e.o. Meiveld, Pavia, Piedra Plat, Hooiberg, Casibari, Sero Lopez, y Sero Pita a keda sin coriente riba Diamars atardi.

   E causa di esaki ta cu un auto a dal den un palo di luz riba caminda principal di Meiveld pa Piedra Plat.  Y e palo di luz aki ta uno cu tin voltahe halto, y tambe un transformer.

   E palo di luz a kibra y cay mey-mey di caminda, cu tur waya colga.  Polis a haye obliga na cera e caminda, y personal di NV Elmar a cuminza cu e proceso pa check e daño, kita tur waya y e palo kibra, pa despues bay pone uno nobo.

   Despues di esey tin di pone isolator nobo na e palo di luz, y hisa un Transformer nobo di mesun amperahe pa mare na e palo.  Despues di conecta tur waya, tin di warda pa expertonan bay keur e instalacion.

   Te despues cu e keur a wordo haci y luz berde a ser duna, e ora numa esnan directo den e area por haya coriente bek.  E costo di un palo di luz cu transformer kibra den un accident, ta masha costoso mes.  Ta di spera cu e persona envolvi su auto tin bon aseguro.

   Ora cu NV Elmar keda full cla, e ora numa personal di Setar Cable Services por rek wayanan di Cable-TV tambe.  Pesey hopi area a keda sin Internet Wi-Fi riba Diamars.