Auto a pasa dal y lastra Prèkè cu tabata drumi abao riba highway

ORANJESTAD (AAN): Tabata Diaranson merdia banda di 1:30 pm, cu un ciudadano a caba di busca su nieta di 8 aña for di scol, y ta caminda bek cune pa cas. 

Nan tabata coriendo den un Kia Picanto color cora cu number A-22977 y a tuma caminda principal di Rotonde Las Americas bay pariba.

   Sinembargo e chauffeur no a ripara cu e conocido Prèkè tabata atrobe pa di tantisimo biaha drumi abao riba caminda.  Esey ta loke testigonan a confirma, cu nan a mira e homber Prèkè drumi abao riba caminda.

   Na numeroso ocasion den ultimo diez añanan, a yega di haya Prèkè drumi banda di caminda, riba caminda, den area di Aeropuerto, Dakota, Buenavista, y tambe Mahuma.

   Pues ora cu e auto compacto Kia Picanto a dal y pasa riba Prèkè, e vehiculo aki cu ta uno cu wiel chikito pues e espacio bao di dje ta lo minimo, a pone cu el a keda lastra e victima bay mas pariba, te ora cu a logra stop e vehiculo.

   Ora e vehiculo a stop, keto bay Prèkè tabata bao di e vehiculo pega.  Testigonan cu a mira esaki a core bin duna un man.  Varios di nan a usa poder di musculo pa hisa e auto, pa asina saca Prèkè for di bao di dje.  Algun a usa nan celular pa yama Polis pa bati alarma.

   Den e Kia Picanto mientras tanto e chauffeur cu ta un persona di edad halto, a keda hopi spanta.  E nieta tambe di 8 aña a spanta hopi, y algun persona a core trece consuelo, y a dune e.o. juice y awa cu sucu pa yude calma.

   E chauffeur a bisa cu el a keda den shock, pasobra realmente e no a mira cu e homber tabata drumi full riba caminda.  Aunke Prèkè tabatin un shirt neon bisti, toch e tabata tin short preto cu no ta duna bon visibilidad abao riba asfalt.

   Pa puro suerte, un Docter di ImSan cu a pasa eybanda, a stop su auto mesora y a yega pa asisti Prèkè cu tabata sangra na pia, y tabata keha di hopi dolor.  Despues di un rato, Docter De Veer tambe cu a pasa, a stop di biaha y a bin ofrece asistencia.

   Mientras tanto Polis y Ambulans a yega.  Paramediconan a check si e pashent ta stabiliza eybao, pa asina a bay cune Hospital pa mas tratamento.

   DIARIO ta corda cu esaki a bira e di dos biaha cu Prèkè ta wordo gedal pa auto, debi na su mal custumber di drumi abao unda cu ta sin preocupa cu nada.