Auto a bula y drenta den cura y keda tur destrui paden

ORANJESTAD (AAN): Testigonan a describi cu nan a mira e auto bay dilanti full speed, sin cu e luznan di brake tabata wordo cendi.

  Ta comosifuera cu e chauffeur tabata primi trot, keriendo cu ta brake e ta primi.

   Diaranson atardi riba caminda di Tanki Flip pa Noord, diripiente un Chevrolet Spark color preto cu number A-53248 a perde control riba su stuur.  Y envez di primi brake, ta parce cu e ta primi trot.

   Consecuencia di esey ta cu el a bay dal cu tur su forza contra e cura di cas di Shaba 12 cu ta net na e cruzada-T pa bay Warda di Polis di Shaba.

   Aki testigonan a mira e auto bay halto, pasa over di e fundeshi abao di e cura, y bay pega y keda dilanti e veranda di e cas di famia Figaroa.  E cas aki ta net otro banda di caminda di Super Do It Center na Shaba.

   E sonido tabata fuerte y mesora a yama Polis y tambe companianan di Roadservice.

   Un dama hoben cu tabata tras di stuur a keda den shock, pero sorprendentemente el a sali ileso.  Pero e vehiculo si a sufri hopi daño parti dilanti na radiator, abao na e motor, y tanto e front grille, bumper, y wantalodo a desaparece.

   Dos dama di e cas por a ser mira sinta den e veranda ta mira con auto a destrui tur nan cura, y e matanan di ixoria cu tin dilanti.  Na final ta e instancianan lo bay traha un rapport pa conclui kico exactamente a socede.