Auto a “bula” over di e Watty Vos Boulevard y bay otro banda

ORANJESTAD (AAN): Chauffeur femenino di un Kia Cerato moviendo Diamars anochi riba Watty Vos Boulevard for di Tanki Leendert rumbo pa Ponton, pa motibo desconoci pa prensa a perde control.

   El a perde control como 150 meter prome cu el a yega rotonde di Ponton.

   E Kia Cerato a bay den un scual, y hala na banda robez di caminda.  Aki el a bay dal den e parti central (‘median’) cu ta dividi e dos vianan. E vehiculo aki a bay halto, pasa over di dje, y finalmente a cay otro banda.

  E vehiculo a keda benta otro banda di caminda, mitar riba e median y caminda, na altura di Ponton 36-H.  E banda aki di via el a ranca varios bloki, y ranca parti di e ‘capa’ cu tin riba e median.  Santo a plama bay te na otro banda di caminda.  Bon mes cu e momento ey ningun vehiculo tabata bin for di direccion contrario.

   Tur dos dama a sali ileso for di e accident, aunke e vehiculo a haya daño considerable parti dilanti, y tambe parti di su wielnan.

   Yamadanan a cuminza drenta na Polis pa 8:20 pm di e accident aki. 

   Polis como tambe Ambulans a yega, y paramediconan a check cu e dos dama pero no tabata necesario pa bay Hospital.  Polis a cera e momento ey Watty Vos Boulevard parcialmente, y a notifica e contratista Mota-Engil tambe di e destruccion.

   Tabata falta apenas 2 pa 3 meter cu e auto lo a dal y kizas ranca e palo di luz tambe.

   Forensys a yega pa asina atende cu e accident.  Polis a keda eynan pa 9:30 pm pa asina personal di Mota-Engil por sigui haci e caminda limpi.  Cu Takelwagen e vehiculo a wordo kita di eynan, como cu e no por core mas.