Auto a bolter na crusada di Sero Pita cu mucha aden

ORANJESTAD (AAN): Diabierna merdia habitantenan a scucha un pito largooo y despues un zonido masha duro mes, net na e famoso cruzada di Sero Pita. 

Testigonan a core mira, y a nota con un auto hatchback cu 3 hende aden, a bolter y finalisa bek riba su cuatro wielnan.  E otro auto a bay para un poco mas pariba.

   Central di Polis cu urgencia a manda patruya di Santa Cruz pa e lugar y a pone Ambulans tambe na altura.  E patruya cu a yega, a bin topa cu un hatchback Opel Astra color shinishi cu number A-62213 mey-mey di caminda.  Indicacion cu e auto aki a bolter y bay bek riba cuatro wielnan.

   Un poco mas pariba riba e caminda cu ta bay pa Ayo, a mira un Toyota Yaris color blanco cu number A-7935 cu basta daño material dilanti.  Aki un dama di edad tabata e chauffeur.

   Den e Opel Astra tabatin un chauffeur masculino, cu su dos yiu homber den auto.  Bon noticia ta cu tur tres tabata den seat belt bisti, strobando cu den e impacto un of mas por a worde saca violentamente for di e auto cu consecuencia fatal.

   Testigonan a bisa cu e Opel Astra tabata bin di panort bayendo direccion Piedra Plat, ora cu e Toyota Yaris a sali su dilanti sin duna preferencia.  E Opel Astra a dal, bolter y para bek cara panort.

   Paramediconan na yegada a solicita pa Vehiculo di Rescate di Brandweer, debi cu nan no por a habri e porta di chauffeur pa saca e tata di Astra. Pero, un bombero a yega y den un ranca e porta a habri y no mester a bay uza ningun ekipo pisa di rescate.

   Dos ambulance a yega e sitio, pa atende cu esnan herida y transporta e chauffeur di e Astra pa Hospital.  Polis di Trafico awor ta investigando.