Auto a bay dal fuertemente den troncon di kwihi na Boulevard

ORANJESTAD (AAN): Tabata Diamars marduga banda di 3:30 am, cu Central di Polis a ricibi informacion cu riba e caminda di Lloyd G. Smith Boulevard

un tiki pariba di edificio di Crown, un accident serio a caba di socede y cu hende herida.  Mesora a dirigi unidad di Polis di Playa, y a pone Centro di Alarma na altura pa manda Ambulans.

   E prome unidad di Polis cu a yega, a bin ripara cu e accident ta net dilanti ex-Kong Hing Supercenter, y un auto sedan Infinty Q50S cu number A-70212 a bay dal den riba palo di luz y troncon di mata di kwihi.  Pa un of otro motibo, el a baha di caminda y bay pega riba e palo di mata.

   Ora cu a ripara cu e porta di e auto sedan no ta habri, a pidi presencia di Vehiculo di Rescate pa duna un man pa habri esaki.

   Bomberonan a yega, a usa ekipo special pa asina rapidamente por a habri e porta.  E chauffeur a scapa di haya golpi mas fuerte, danki na airbag cu a habri.  Toch a haya golpi na rudia, y descomfort di e cayente di airbag cu a mishi cu su curpa.