Ambos chauffeur di un accident frontal a keda deteni pa buracheria

ORANJESTAD (AAN): Diadomingo anochi laat polis a bay riba Schotlandstraat pa un accidente di trafico serio.

   Na yegada poco pazuid di Romar Trading, Polis a bin topa cu dos auto kibra riba caminda. Tabata trata di un auto compacto Toyota Vitz y un vehiculo tipo SUV Ford EcoSport.

   Den e Ford EcoSport, polisnan a constata cu tin un menor di edad y cu e lo ta herida. Mesora a solicita pa ambulance. Brandweer tambe a presenta, pero no tabata necesario drenta den accion directamente, debi cu no tabata tin hende pega den e autonan.

   Polis a papia cu ambos chauffeur, unda cu a haci e Alco Sensor IV test y esaki a sali positivo pa core auto, y tambe pa esun coriendo vehiculo di ta bao influencia di alcohol.

   Polis e ora a pone boei na man di chauffeur di e vehiculo Ford, y tambe pone boei na man di chauffeur di e auto Toyota Vitz tambe a wordo poni den boei.

   A busca Vehiculo di Transporte pa asina e dos detenidonan a ser hiba warda, unda a presenta nan dilanti Fiscal Auxiliar.

   Un agente policial a bay den ambulance, pa acompaña y calma e criatura, esta un mucha homber chikito cu tabtaa basta spanta.  Asina a bay cune Hospital pa check-up, y pa yama famianan bay aya.