Accidente fuerte riba Diadomingo atardi na Sero Pita

ORANJESTAD (AAN): Chauffeur di un auto compacto Nissan March color biña cu number A-59550 coriendo riba e caminda di Tamarijn pa Sero Pita,

na altura di e T-weg banda di Sero Pita 29 a bay bira na su man robez pa drenta e caminda cu ta bay pa e.o. Emmaschool na Ayo.  Chauffeur a bira sin cu el a ripara cu un sedan BMW color preto cu number A-66804 ta bin di direccion contrario.

   Esaki a produci un impacto fuerte cu a laga ambos vehiculo destrui, y debi na e movimento di e BMW, esaki a baha di caminda y bay pega bao di un palo di mata cu algun baranca bao di dje, net dilanti Sero Pita 29.

   E prome yamada a drenta Diadomingo poco despues di 3:00 pm, y mientras cu unidad di Polis di Santa Cruz ta bayendo pa e accident, Central di Polis a ricibi mucho mas yamada pa indica con severo e boksmento aki ta.  E prome unidad cu a yega, a pidi pa manda varios Ambulans como cu tin multiple hende herida, y cu den e BMW tin hende pega den e auto tambe.  Asina a pone cu Vehiculo di Rescate di Cuerpo di Bombero tambe a sali pa e lugar.  Un spuitwagen di Bombero tambe a bay na e lugar.

   Dos unidad di Ambulans, como tambe Rapid Responder a yega na e lugar.  Bomberonan tambe a yega pa asina na un forma tactico a saca e persona pega den e auto.  Paramediconan a cuminza suministra medicamento na e herido mes den e auto.

   Mas unidad di Polis a wordo manda pa asina cera e cruzada di Sero Pita, y mas panort tambe na Tamarijn.  Polis a nota tambe cu tin algun mucha tambe tabata den un di e autonan, pero nan lo a keda levemente herida.

   Finalmente despues di a haci e trabao dificil di saca heridonan, en total 2 persona a wordo hiba cu Ambulans pa Hospital.