Accidente fatal na Warawara a cobra bida di Eduardo Thiel (54)

E ta bira e di 10 morto den trafico

ORANJESTAD (AAN): Dialuna merdia, rond di 2:40 pm, Central di Polis a ricibi un notificacion tocante un accidente grave riba caminda di Warawara na Santa Cruz. Segun e prome informacion, un pick-up a bolter y e chauffeur a keda traha pega bou di e vehiculo.

Patruya di polis, ambulance y brandweer a wordo despacha di inmediato pa e sitio. Na yegada, nan a topa un Toyota Hilux color shinishi, cu e chauffeur ainda pega bou di e auto. Polisnan a logra saca e victima, y personal di ambulance a duna asistencia medico, pero lamentablemente no tabata posibel pa salba su bida.

Specialista di trafico y polis tecnico a yega pa tuma encargo di e investigacion. Pa loke ta e parti forensico, Dr. Voskuil a presenta despues, y a declara fayecimento di Eduardo Thiel, naci na Aruba dia 29 di december 1970 (54 aña).

Aruba ta registra e di 10 morto den trafico pa 2025. DIARIO y Cuerpo Policial ta manda nan sentido pesame na famia di e fayecido.

Cuerpo Policial ta pidi atencion special na tur automobilista: december ta un luna hopi druk, y precisamente pa e motibo aki mester pone mas atencion, sigui reglanan di trafico, core sigur y sin pura. Hunto por preveni desgracia, pa por pasa un Pasco sigur, yena cu paz y yega na un aña nobo banda di e sernan keri.