Accident violento a costa bida di dama hoben

Net na birada na final di Westpunt pa Malmokweg

• Por poco Nissan Skyline a dal frontal contra Polis tambe
• Pa ora cu Polis a bira pa bay su tras a perd’e fo’i bista 

ORANJESTAD (AAN): Diadomingo marduga pa mas o menos 2:50 am, e unidad 4x4 di Cuerpo Policial cu ta encarga cu Control di Costa, tabata moviendo riba caminda di Westpunt y bon mes cu e Polis tras di stuur a reacciona rapido pa desvia, pasobra inespera un auto coupe tipo Nissan Skyline cu ta bin di direccion contrario cu speed hopi halto, casi un tiki mas lo a plama frontal den nan.

   E unidad di Polis a logra di baha di caminda, y a dicidi pa bira pa bay tras di Nissan aki y informa Central di Polis. Pero e vehiculo 4x4 policial a tarda un poco pa bira y pa haya velocidad bek pa bay su tras.  Ya pa awor e Nissan Skyline a desaparece for di nan bista bayendo panort.

   Toch e unidad di Polis a cuminza move bay den e direccion nort tambe.  Yegando banda di Gold Coast Residences e unidad di Polis a mira monton di stof ta bayendo halto, net na e birada cu tin pa e caminda bay pa Malmokweg, na altura di e muraya di Tierra del Sol.  A resulta cu ta e Nissan Skyline a bolter!

   Vehiculo na werki: A resulta cu e chauffeur no por a tuma e birada bon, of a lubida cu eynan tin birada, y a bay plama su auto! E impacto violento aki a kibra e coupe den dos.

   Ora cu Polis a yega, a bin ripara cu ta trata aki di un Nissan Skyline color shinishi.  Polis a topa cu e hoben chauffeur masculino, kende a manera sali ileso.  El a informa Polisnan cu den su auto tin un mucha muher tambe, pero e no a sali.

   Canando den tur e matanan aki, Polis a mira cu flashlight cu e dama hoben no ta reacciona, y mesora a pidi pa presencia di Ambulans.  Mirando e destruccion, a pidi pa manda Vehiculo di Rescate tambe di Cuerpo di Bombero.  Otro banda di caminda, cerca di muraya di Gold Coast Residence a bin haya un wiel tambe benta.

   E prome unidad di Ambulans a yega, y Paramediconan a bay check e dama hoben, pero a bin nota cu e no tin señal vital mas.  Indicacion pues cu el a fayece al instante.  Toch lo rekeri yudansa di Bomberonan pa saca e curpa di eynan.  Mesora a pidi Centro di Alarma pa manda busca Docter.

   Investigacion forensico: Central di Polis na su turno a percura pa e caminda a wordo cera, y a manda notifica tur alto autoridad pa acudi eynan, incluyendo di Ministerio Publico.  Specialista di Trafico tambe a yega.

   Vehiculo di Rescate na un forma coordina y cu cautela, a logra di saca e dama hoben for di auto. 

   Finalmente te banda di 5:00 am, Docter a presenta y a constata morto di e dama hoben Dariana I. Heredia de la Rosa, naci na Republica Dominicana dia 25 Juli 2006, pues tin 17 aña, faltando 3 siman pa e cumpli 18.

   Fiscal a duna ordo pa confisca e curpa pa asina haci autopsia riba dje.  Polisnan mes tambe a detene e hoben masculino cu tabata tras di stuur.  Nan no a detene pasobra e ta bao influencia, sino pasobra el a core auto iresponsabel y ocasiona morto di un persona.

   E birada a keda cera pa basta ora, debi cu Team Forensico di BFTO a haci un investigacion extensivo eynan, incluyendo Docter Forensico.  Ora cu solo a sali pa 6:20 am, ainda autoridadnan hudicial tabata haciendo investigacion.  Nan a haci investigacion di tur cos, e.o. documenta tur detaye cu e auto por duna nan, posiblemente anota si seatbelt tabata bisti, si acaso airbag a sali, y kizas usa e memory chip den e airbag module pa asina haya sa con duro e auto tabata moviendo na momento di e impacto.

   Cu e accident aki, Aruba ta conoce pa aña 2024 su di 7 morto den trafico, den un tempo relativamente cortico.

  Te Diadomingo atardi, pues mas di 12 ora despues, Polis a logra haya sa e identificacion di e dama hoben.

  E prome mitar di dia tabata reina incertidumbre di con ta tarda pa identifica e dama hoben.  Pa colmo, Polis no a duna prensa ningun detaye tampoco, si acaso e victima tin cabey largo, su color di cuero, ki tipo di paña e tin bisti, ki zapato, etc.   Di e mucha homber ta conoci cu e tin color di cuero cla, y ta basta delega.  E number di auto tampoco Polis no a duna.

   DIARIO como tambe Cuerpo Policial ta manda palabranan di condolencia na famia di e fayecida.

   Polis a bisa cu e chauffeur a keda deteni pa investigacion.