Accident na Savaneta net ora di control di trafico pisa

ORANJESTAD (AAN): Diasabra mainta despues di Jouvert Morning, diferente unidad di polis a tene e control di tur aña despues di paradanan grandi na San Nicolas. 

   Algo pasa di 9’or y mey polis motorisa tabata ocupa cu su control y dado momento a surgi un boksmento, entre 3 auto.

   Mesora nan a bay atende esaki. E autonan envolvi tabata un sedan Kia Serato color shinishi cu number A-75658, un vehiculo Toyota pickup color blanco, y un Chevrolet Aveo hatchback color blauw 

  Mirando cu ta e Kia ta esun cu a ocasiona e accidente door di no mantene distancia.  El a dal tras di e Pickup, y esaki na su turno a dal tras di e Chevrolet.

   Polis a atende e chauffeur di e Kia Rio, y a nota cu e compay ta parce di ta bao influencia.  Pesey polisnan a pone supla.  Ora cu el a supla na Alco Sensor IV, e cifra di µg/l tabata demasiado halto.  Pues e ta oficialmente burachi.

   Autoridadnan mesora a bay over na detene y alavez pidi Vehiculo di Transporte.  Daño material na e otro autonan ta considerabel. No tabata tin daño personal.