Aruba ta conoce su di 2 morto den trafico
*dos mucha seriamente herida
ORANJESTAD (AAN): Cuerpo Policial a informa cu pa 6:06 di atardi, Central di Polis a wordo notifica cu tin un accident basta pisa na altura di Op=Op ariba Avenida Nelson O. Oduber. Di biaha Central a despacha patruya policial, como tambe bombero y ambulance cu maximo urgencia na e lugar di e accidente.
Un auto marca Honda aparentemente a perde control y a dal den un mata di kwihi. Na yegada di patruya, agentenan por a constata cu tabatin tres persona envolvi den e accident, na unda dos mucha tabata seriamente herida y un dama cu no tabata duna señal di bida.
Bomberonan a logra saca e curpa sin bida di e dama y pa 7’or di anochi, doctor Texier a constata morto di e dama di inicialnan J.W.R.I.G. naci na Aruba di 24 aña di edad.
Specialista di trafico como tambe polis tecnico a presenta na e lugar pa cuminsa haci nan investigacion. Alto Comisario di Polis Sr. Ramon Arnhem a presenta na e lugar y mira e situacion tragico aki.
DIARIO y Cuerpo Policial Aruba ta manda palabra di condolencia na famia di e fayecido
