Accident fuerte entre dos vehiculo y un boto a finaliza den maltrato

Caso den caminda smal di Soledad

ORANJESTAD (AAN): Tabata Diaranson atardi, esta riba Bispo di Aña Nobo, cu Central di Polis a ricibi informacion cu riba e caminda smal cu ta pasa door di Soledad, tin un accident di vehiculo.  Despues a drenta informacion pa Polis bay mas rapido, debi cu esnan envolvi tabata dal otro.

   E caminda cu ta pasa den Soledad ta notorio pa con smal e ta.   Ora cu Polis a yega, a bin nota cu no ta trata di accident di auto manera prome version, pero ta un dalmento entre un vehiculo Ford Pickup color blauw (lastrando un boto grandi), y un vehiculo Ford Bronco blanco.  Nan a dal den e parti hopi smal di e caminda, caminda normalmente chauffeurnan tin di core mas amistoso, y ofrece e otro trafico un chens di pasa den e pida smal.  Pero aki esaki no a socede, y a dal duro den otro.

   Polis mester a yega lihe na e lugar di accident, debi cu chauffeur di e Ford Pickup cu tabata lastra e boto a dicidi na baha su rabia, ataca y maltrata ambos ocupante di e Ford Bronco.  Despues di a comete esey, el a bandona e lugar.

   Polis a yega pero ya caba e homber a bay.  A cuminza atende e detayenan di e accident, como cu e daño material ta considerabel, tanto na ambos vehiculo y tambe e boto, y e trailer di boto.  Personal di Roadservice tambe a yega.

   Diripiente e persona cu a agredi e ocupantenan a yega, y Polis mesora a aresta e homber.  A manda busca vehiculo di transporte, y asina a bay cu ne pa e wordo interoga.  Pasobra di un accident, e caso a bira awor maltrato severo.

   Cu auto particular, un di esnan herida door di e maltrato a wordo hiba pa Hospital.