Accident fuerte cu hopi daño material un biaha mas na Sero Pita

Chauffeur a sali cay di auto

• Un solo auto cu no a duna preferencia a ocasiona tur cos 

ORANJESTAD (AAN): Tabata Diahuebs den oranan di merdia un biaha mas polis y ambulance a bay e crusada di Sero Pita, como cu e biaha aki a registra un accident fuerte eynan, entre 2 auto y 1 vehiculo.

   Central di Polis a manda patruya di Santa Cruz cu urgencia eynan, y a cuminza manda Ambulans tambe. Na yegada di e prome unidad di Polis, e funcionarionan a constata cu tin tres persona levemente herida.

   E vehiculo cu a causa e accidente, esta un auto compacto Toyota color preto cu number A-4910 yegando for di Ayo, a subi e crusada sin duna preferencia, y a dal contra un Toyota Vitz color geel cla cu number A-72561 cu tabata bayendo nort direccion Tamarijn.

   El a dal na e banda drechi di e Toyota Vitz unda e stuurwiel ta, y e impacto a pone e porta dal habri, y e chauffeur cu no tin seatbelt a djis sali cay di e auto.  E auto cu e momentum di movimento a keda core bay su so direccion panort.

   Net e momento ey for di direccion contrario tabatin un vehiculo SUV Lincoln color preto cu number A-1941 ta bin, y no por a haci nada pa evita cu e Toyota Vitz a bin dal riba dje.

    Tur dos auto, y e vehiculo a ricibi hopi daño material. Paramediconan di diferente Ambulance cu a presenta a bay duna asistencia na e heridonan, cu mas bien tabata trata di heridanan leve.

  Polis a tene e caminda cera, debi cu takelwagen mester a hala e autonan cu no por a move ariba nan propio forsa.

  Algun habitante a acerca DIARIO, y ta kere cu mirando cuanto accident ta socede eynan tur luna, kizas DOW tin di pone urgencia pa cambia e structura y pone un rotonde cu lo por scapa bida di hende.