Accident basta fuerte a pone chauffeur colapse despues banda di caminda

ORANJESTAD (AAN): Dialuna atardi un poco despues di 2:00 pm, un accident a socede riba Caya Nelson Florencio Sprok,

apenas 30 meter leu for di e caminda di Bubali.  Esaki ta e caya cu ta core entre Yami Yami na Bubali y sucursal di CMB Bank na Palm Beach, pues e caya cu ta pasa door di Washington.

   E chauffeur den un Nissan March color blauw cla cu number A-8785 bayendo rumbo pa Bubali, a caba di pasa den e birada di Caya Nelson Sprok, ora cu el a haye obliga na desvia pa un vehiculo cu ta bin di direccion contrario.  Esaki a pone cu su Nissan a bay den un scual, y cu momentum fuerte a bay dal den un palo di kwihi cu tin banda pabao di caminda.  E palo di kwihi a hasta kraak y cay un banda.

   Den e impacto aki, e chauffeur a bay dal cu su cabez fuertemente den e windshield di su auto, y a laga e glas tur kibra.

   El a baha pa asina check su auto, pero el a cana djis un par di meter so banda pazuid, y diripiente el a bay for di tino, y a zak den otro banda di caminda.

   Yamadanan a cuminza drenta mesora na Polis como tambe Ambulans pa e caso serio aki.  Ora cu Polis a yega, nan a bin topa e chauffeur benta abao ta drenta y sali bek for di tino, y nan a pidi pa Ambulans yega cu mas urgencia.

   Unavez cu Ambulans a yega, nan a check tur su señalnan vital, y despues di a stabiliza su curpa, a bay cune rumbo pa Servicio di Emergencia na Hospital pa tratamento mas amplio.  E otro vehiculo aparentemente no a stop, y a sigui bay.  Esaki ta debi cu nan dos no a dal den otro.  Unico daño tabata na e Nissan March, y na e palo di kwihi di naturaleza.

   Polisnan a cera e cruzada aki, y esaki a crea un tiki caos como cu e oranan ey ta hopi trafico ta bay y bin for di e scolnan na Washington.  Hasta un bus grandi a haye ta haci maniobranan pa bira bay bek, debo cu e no por a sigui su rumbo.