Tur cinco sospechoso a worde deporta caba pero a haya castigo di prison
ORANJESTAD (AAN): E hombernan di Trinidad, esta e acusadonan di inicialnan S.M., M.B., J.M. y e Venezolanonan E.B.B., E.C.R. y E.S.M. riba Diahuebs mainta nan caso a worde trata sin cu nan tabata presente.
Ta asina cu despues di un periodo deteni den KIA, nan a worde deporta. Nan ta worde acusa di importacion di 880 kilo di marihuana riba 30 di December 2022. Hues a bisa cu promer cu e grupo aki a worde deporta, tur a haya un citacion pa e caso. Nan abogado mr. Canwood tabata presente.
Tira riba boto cu 880 kilo di marihuana: Fiscal a bisa cu e ta haya legalmente proba cu e grupo a importa 880 kilo di marihuana. Tambe e ta haya cu nan tabatin e lote grandi di droga den nan poder y a transporta esaki.
Fiscal a mustra cu segun e raport di Wardacosta di Caribe Hulandes, a intercepta e boto despues cu riba marine-radar a mira e boto den awanan internacional direccion pa Aruba.
E miembronan di Wardacosta a mira hendenan cu pakinan di droga riba e boto. A los tiro di advertencia y asina e boto a para.
Exigencia di Fiscal: Fiscal a bisa cu e Venezolanonan ta bisa cu nan a worde secuestra y cu nan tabata sa di e droga. Fiscal a exigi 12 luna di prison pa esnan di Trinidad S.M., J.M. y M.B. y 9 luna di prison pa esnan di Venezuela E.B.B., E.C.R. y E.S.M.
Defensa di Abogado: Abogado mr. Canwood a bisa Hues cu e droga tabata destina pa Trinidad y no pa Aruba. E abogado ta haya cu por acusa e acusadonan di transporta droga pero no importa droga.
Segun e abogado e ta kere cu E.S.M., E.B.B. y E.C.R. a worde secuestra y menaza. E ta haya cu e castigo ta exagera mirando cu tabata transporta y no importa droga.
Sentencia: Hues a sera tratamento di e caso y a dicta sentencia di biaha. Na opinion di Hues, e tres Venezolanonan E.S.M., E.B.B. y E.C.R. ta bisa cu nan a worde secuestra pero nan a duna declaracion diferente. Esey ta haci cu Hues no ta kere nan. E ta haya cu mirando cu nan tabata riba un boto cu 880 kilo di marihuana, e no ta haya cu nan tabata secuestra.
Pa loke ta e punto di bista di defensa cu no tabata importacion, Hues a bisa cu nan tabata navega for di awanan Venezolano y bin direccion di Aruba. E ta haya cu esaki por worde considera exportacion. Mirando e cantidad di droga, esaki ta castigabel y ta malo pa salud pa hende. Hues ta haya cu mester manda un señal cu no ta permiti traficacion di droga.
El a condena e trio di Trinidad, S.M., J.M., y M.B. na 12 luna di prison. Hues a condena e trio Venezolano E.S.M., E.B.B. y E.C.R. na 12 luna di prison di cual 4 luna ta condicional y cu 2 aña di prueba. E droga mester a worde destrui.
