Homber cu atentado contra turismo di Aruba
ORANJESTAD (AAN): E homber Dominicano Gender S. Hernandez di 44 aña, acusa di “skimming” (copia credit cards) y forma parti di un organizacion criminal, a presenta siman pasa den sala di Corte pa scucha su sentencia.
Luna pasa tratamento di e caso a tuma lugar caminda Fiscal a exigi 3 aña di prison p’e. E tabata saca potret cu su smartphone di credit cards na e restaurant den un hotel unda e tabata traha y ta manda esakinan pa un tal Alex y Diego den exterior. Esaki lo mester a sosode entre Juli 2021 y September 2022. American Express a haci denuncia na Polis di Aruba cu nan a worde horta 184 mil dollar na credit cards falso. Hues ta haya Hernandez culpabel di skimming y forma parti di un organizacion criminal.
A hit American Express mas di 184 mil Dollar: Durante tratamento di e caso luna pasa 17 Maart 2023, Fiscal a bisa Hues cu e caso aki a cuminsa ora cu American Express a haci denuncia na Polis di cu a hit e compania 184.190 dollar, door di falsifica credit cards. Esaki tabata sosode na un restaurant den un Hotel. Porfin riba 21 September 2022 Hernandez a worde deteni y den su camber a haya aparato di skimming y un laptop computer.
Fiscal a mustra cu Hernandez a declara cu pa añas e tabatin amistad cu un tal Alex y na dado momento Alex a ofrece pa saca potret di credit cards y ta paga 20 dollar pa potret. Mas cu 1385 potret Hernandez a saca di credit cards, di cual 308 ta di American Express. Segun American Express 20 carchi a usa cu casi 184 mil dollar na Merca.
Na opinion di Fiscal, si bay conta tur e carchinan falsifica ta yega den miyones di dollar. El a bisa cu Hernandez tin suerte cu ta solamente American Express a haci denuncia.
A skim credit cards: Fiscal a mustra cu solamente saca potret di credit card bo no tin nada. Mester di informacion di e carchi y data di e carchi. Fiscal a bisa cu Hernandez por nenga di a usa e aparato di skimming pero tin sospecho cu e tabata usa esaki y manda informacion riba laptop.
Fiscal ta haya cu Hernandez ta forma parti di un organizacion criminal cu tabata dedica su mes cu fraude di credit cards. Ta door di Hernandez tur informacion di credit cards tabata worde manda pa Alex y Diego den exterior durante 1 aña y 3 luna.
Perhudica turismo di Aruba: Fiscal a anuncia cu lo bay cuminsa un caso di kita propiedadnan di Hernandez, mirando e cantidad di placa cu el a gana pa saca potret di credit cards. Fiscal a bisa cu skimming di credit cards ta sumamente fastioso tanto pa e usador di e credit card y e companianan cu ta facilita credit cards.
Esaki ta mina e sistema financiero y ta afecta turismo. Durante un periodo largo, Hernandez a traha cu e organizacion criminal. Fiscal ta haya cu mester manda señal bon cla cu no ta tolera esaki cu ta perhudica turismo di Aruba. El a exigi 3 aña di prison pa Hernandez Den sala di Corte por a mira cu familiar di Gender Hernandez tabata presente.
Sentencia di Huez: Den su sentencia, Hues a bisa cu e ta haya legalmente proba cu e homber Hernandez a forma parti di un organizacion criminal y a pasa informacion di credit card.
Hues a sigui bisa cu e ta haya cu Hernandez tabata saca potret di credit cards, skim e credit cards y manda pa hendenan. Hues a bisa cu e no ta kere e declaracion di Hernandez, cu e no a usa e aparato di skim.
Hues a bisa cu e caso aki ta hopi serio. Su actonan a afecta American Express y e clientenan.
Acusado a yora: Hues a bisa cu e ta haya e exigencia di Fiscal na su lugar pero teniendo cuenta cu Hernandez ta “first offender”, a conden’e na 3 aña di prison di cual 6 luna ta condicional cu 2 aña di prueba.
Por a ripara cu e castigo a dal Hernandez duro. El a baha cabez y a cuminsa yora. Ora di sali for di sala el a pidi pa e por bay brasa su famia, pero seguridad di Corte a neng’e di haci esey.
