Mas cu 1.5 kilo a keda confisca
ORANJESTAD (AAN): Riba Diahuebs mainta. Hues di Corte den Promer Instancia a haya e homber R.K., J.C. y A.C. culpable di hunto a exporta 1.5 kilo di cocaina.
Ademas Hues ta haya A.C. culpable di a maltrata su pareha cu un cuchiu.
Ta asina cu miembronan di US Customs and Border Protection (CBP) na Aeropuerto di Aruba a gara nan ora nan kier a bay Miami. Fiscal a exigi 21 luna di prison di cual 9 luna ta condicional pa R.K. y A.C.
Pa J.C. el a exigi 18 luna di prison di cual 6 luna ta condicional. Diahuebs mainta Hues a condena R.K. y J.C. na 18 luna di prison di cual 6 luna ta condicional. Hues a condena A.C. na 21 luna di prison di cual 9 luna ta condicional.
COCAINA: Algun siman pasa tratamento di e caso a tuma lugar caminda Fiscal a acusa R.K., J.C. y A.C. cu dia 21 Januari 2021, hunto a exporta 1549,6 gram di cocaina. A.C. a admiti di a haci’e. J.C. tambe a admiti y a bisa cu el a siña su les. J.K. tambe a admiti.
Tur a haci’e door di situacion financiero malo.
Hues a bisa cu segun investigacion di Polis, nan tres kier a bula bay Miami y miembronan di Pre-Clearance di Merca a separa nan y mas hende pa check. A.C., J.C. y R.K. a bisa e miembronan di US Customs and Border Protection cu nan a guli bolitanan di cocaina. Nan a worde pasa pa Douane y despues nan a worde pasa pa Polis.
Despues di sigui e proceso pa laga nan saca e bolitanan. J.C. a saca 60 bolita (664,1 gram), A.C. a saca 70 bolita (775,3 gram) y J.K. 10 bolita (110,2 gram).
A.C. divulga y bisa cu ta R.K. a bin cu e bolitanan y a bisa cu A.C. cu e lo haya 60 Dollar pa cada bolita. R.K. a hiba e bolitanan den un icejug. J.C. a bisa Hues e no tabata sa cuanto placa e lo haya. Tabatin contacto via Whatsapp y Polis a constata cu R.K. ta esun cu a organiza tur cos.
DISCUSION DEN CORTE:
A surgi discusion entre J.C. y R.K. riba cumpramento di pasashinan pa viaha. Guardianan di CEA a actua di biaha y a hala nan atencion. Hues a mustra cu na oficina di viahe ta R.K. ta esun cu a paga pa e pasashinan di viahe.
Segun R.K. el a worde menaza door di un Colombiano. El a bisa cu el a bira malo ora di guli y no por a guli mas. E Colombiano a bis’e pa haci’e pa su famia. R.K. a bisa Hues cu e no ta doño di e droga y cu J.C. y A.C. sa bon kende ta doño di e droga.
Hues a mustra cu tanto J.C. como A.C. bisa cu ta R.K. ta e doño. Hues a mustra cu for di investigacion ta sali na cla cu R.K. tabata busca hende. Hues a puntra R.K. kende ta e Colombiano. R.K. no kier a bisa kende ta e persona pasobra lo tuma represaya contra dje.
MALTRATA CU CUCHIU:
A.C. a bisa Hues cu e ta arepenti cu el a maltrata su señora. Hues a mustra cu e señora a declara na Polis cu el a mira cu A.C. a yega cas straño. Na dado momento A.C. a pone cuchiu na garganta di su señora y bis’e pa bisa si e tin un otro. A.C. a dal’e cu e plano di e cuchiu na su braza. Hues a mustra cu tin potret di marca na e señora a haya na su braza.
FISCAL:
Fiscal a bisa cu e ta haya legalmente proba cu e trio aki a exporta droga. Tur tres a admiti. E ta haya cu hunto nan a guli bolitanan, lo viaha hunto y a cumpra ticket hunto. Fiscal a bisa cu segun J.C. y A.C. ta R.K. ta e doño di droga. Na opinion di Fiscal, no tin prueba cu ta R.K. Tin suficiente prueba cu R.K. ta esun cu a busca hende pa hiba droga. E tabata e intermediador cu tabatin contacto cu e doño di e droga.
Pa cu e castigo, Fiscal a bisa cu droga ta trece hopi problema rond mundo. E ta causa hopi problema social y ta fomenta criminalidad. Tambe Fiscal ta haya proba cu A.C. a maltrata su señora cu e plano di un cuchiu. Fiscal a mustra cu Ministerio Publico tin un maneho pa cu transportacion di droga. El a exigi pa J.C. 18 luna di prison di cual 6 luna ta condicional cu 2 aña di prueba. El a exigi pa R.K. y A.C., 21 luna di prison di cual 9 luna ta condicional cu 2 aña di prueba.
SENTENCIA:
Hues ayera mainta a bisa cu Corte ta haya R.K., J.C. y A.C. culpable di a exporta cocaina. Tur tres ta castigabel pa exporta mas cu 1.5 kilo di cocaina. Pa cu e castigo, Hues a bisa cu e ta tene na cuenta cu droga ta causa adiccion y criminalidad.
E ta haya cu e trio aki a coopera den distribucion di droga. El a sigui bisa cu A.C. a maltrata su señora cu un cuchiu. Esaki tambe ta castigabel. Hues ta haya cu A.C. a hacie door di jaloersi. Hues a bisa cu A.C. a tacha e integridad di su señora.
CASTIGO:
Hues a condena R.K. y J.C. na 18 luna di prison di cual 6 luna ta condicional y 2 aña di prueba. Hues a condena A.C. na 21 luna di prison di cual 9 luna ta condicional y 2 aña di prueba. Esaki pasobra A.C. ademas di e droga a maltrata su señora.
