ORANJESTAD – Diabierna mainta Corte di Husticia a trata e caso sumario cu A. Dowers, M. de Meza y Wyatt-Ras di partido AVP a cuminsa contra Gobierno pa e reconteo di votonan.
Den sala di Corte por a mira ex vice presidente di Conseho Electoral, señor Maduro y e presidente presidente actual Monica Kock. Ta solamente Mike de Meza a presenta.
E caso ta relaciona cu e decision di Conseho Electoral riba 6 Juli 2021, cu a rechaza e peticion di reconteo. E tres miembronan di AVP ta contra e decision aki. Abogado mr. D. Croes hunto cu mr. Mohamed a representa e tres miembronan di AVP.
NO A KIMA CARCHINAN DI VOTA AINDA
Mr. Croes a bisa Hues cu promer cu cuminsa cu su demanda, e kier puntra si e carchinan di vota a wordo destrui. Hues a bisa cu e pregunta ey ta pa Gobierno. Ta asina cu Conseho Electoral a duna orden pa destrui e carchinan di voto. Señora Monica Kock a bisa Hues cu door di e caso sumario aki no a destrui nan ainda.
AVP KIER RECONTEO DI VOTONAN
Mr. Croes a mustra cu segun ley di votacion, por demanda reconteo ora ta haya cu e conteo no tabata corecto. El a bisa cu tin 890 voto ilegal entre nan e votonan en blanco. E ta haya cu e cantidad di votonan ilegal ta mas halto cu anterior. E abogado a mustra cu pa un “restzetel” entre MEP y AVP ta 53 voto. Pa 53 voto, AVP no a haya 8 asiento. Na opinion di e abogado, si AVP a haya 8 asiento, esey lo a trece henter un otro panorama. Ta asina cu Conseho Electoral a dicidi cu no ta bay haci reconteo.
E abogado a bisa Hues cu tabatin cosnan straño ora di dicidi cual voto ta ilegal of no. El a mustra cu tabatin caso cu pasobra a pasa un tiki e circle cu e potlood cora, esaki ta wordo considera valido pa MEP y pa AVP esaki ta wordo considera invalido. El a sigui bisa cu AVP a presenta 3 mil firma di protesta na Conseho Electoral pero Conseho Electoral a bisa cu a controla caba e 890 votonan ilegal y no mester bolbe controla. E abogado ta haya cu esaki ta violacion di ley di votacion. Na opinion di mr. Croes, si tin protesta mester haci reconteo. El a pidi Hues pa ordena un reconteo di tur urnanan electoral y subsidiario reconteo di e 890 votonan ilegal.
GOBIERNO NO TA MIRA PAKICO UN RECONTEO
E hurista di Gobierno a bisa Hues cu Gobierno no ta mira e interes di AVP pa reconteo. El a mustra cu AVP den su protesta haci na Conseho Electoral no a argumenta esaki. Na opinion di e hurista, si imagina cu AVP a haya e 53 votonan, e miembronan lo keda Parlamentario. El a desmenti cu lo tabatin escogencia den votonan ilegal. El a mustra cu Conseho Electoral a revisa e votonan ilegal. El a señala cu un di e votanan cu AVP ta cuestiona cu no ta ilegal, ta cu e cara di Eman tambe a wordo pinta cora. Esey no por y pesey a wordo declara no valido. E hurista ta haya cu den e caso aki no tin interes general mirando cu ya e parlamentarionan a wordo huramenta.
Mr. Croes a reacciona cu tur otro partido, cu excepcion di MEP, a haci protesta. A presenta pruebanan cu cos no a bay bon cu votacion.
Hues a bisa cu na tur urna tabatin instruccion con un voto ta ilegal y con un voto ta legal. Mr. Croes ta haya cu esaki no tabata bon splica y cu esaki ta un fayo di Gobierno. E ta haya cu e pintamento di cara di Eman cora ta hustamente pa mustra cu ta pa Eman ta vota. Hues a mustra cu e por ta tambe cu e votador no kier Eman.
Hues a bisa cu e ta bay studia e caso y dia 11 Augustus 2021 lo tin sentencia.
