A haya lote miyonario di marihuana na un cas
ORANJESTAD (AAN): E homber di inicial J.O.T. y e muhe V.V. a scucha Hues confirma e exigencia di Fiscal pa nan. Hues a hala nan atencion cu normal e castigo lo mester ta hopi mas halto. Nan a wordo haya culpabel cu entre 1 September 2025 y 23 September 2025, intencionalmente nan tabata bende, transporta of posesion di marihuana. Polis a haya 282 kilo di marihuana den e cas caminda V.V. tabata keda na Zeewijk.
Bendemento di Droga: Hues djis na forma direct a puntra J. si e acusacion ta berdad y J. a admiti cu el a suministra marihuana. El a bisa cu 4 biaha el a transporta marihuana di un lugar pa otro. Tambe el a duna amigonan dos pa tres biaha marihuana. El a bisa Hues cu nunca el a haya pago pa e transporte di marihuana. El a bisa cu e homber Venezolano tabata yam’e y e tabata haya tas cu marihuana pa hiba na un lugar. Hues a puntr’e si e tabata bay busca e droga y si e tabata haya placa. J. a splica cu tur cos tabata depende unda J. tabata.
Tin biaha e Venezolano ta hiba e droga p’e. Ta trata aki di pakinan di 1 kilo di marihuana. El a bisa cu e tabata cumpra for di e Venezolano pa 8 aña. Segun J., e tabata huma hopi marihuana y e tabata haya marihuana como pago pa e transportenan cu e tabata haci. Hues a puntra J. cuanto droga el a haya. J. ta calcula cu el a haya 200 pa 300 gram cu segun J. ta mas o menos 300 pa 400 Florin. Hues a puntr’e si e tabata bende cu amigonan.
Acusado J. a splica Hues cu amigonan tabata pidi’e pa droga y e tabata contact e Venezolano y e Venezolano tabata trece e droga p’e y e tabata hiba e droga pa e amigonan. El a splica cu hopi biaha tabata 10 gram cu ta 80 Florin. Hues a remarca cu e 300 gram cu J. tabata haya ta 2400 Florin y no mas o menos 300 pa 400 Florin. Hues a remarca cu si J. tabata tuma cen di amigo y bay cumpra for di e Venezolano, esey ta wordo considera como un bendedor. Segun J., e no tabata bende.
Total 282 kilo di marihuana confisca: Acusado J. a bisa Hues cu el a acerca e muhe V., cu tabata un colega di trabao na un hotel, pa warda e lote di marihuana. Segun J. via V. el a papia cu e Jamaiquino pa e Jamaiquino y e Venezolano papia y yega na un palabracion pa warda e lote di droga. V. a declara cu ta e Jamaiquino a pidi’e pa warda e droga. Segun V. e conoce e Jamaiquino pa basta tempo. El a bisa Hues cu el a haya un yamada di un Venezolano pero e no conoce.
El a bisa Hues cu el a bisa e Venezolano pa papia cu e Jamaiquino y despues e Jamaiquino a pidi V. pa warda droga p’e. Segun V., e lo a haya 5 mil Florin pa warda e droga. Ariba pregunta di Hues, el a bisa cu e no tabata sa cuanto droga el a haya pa warda. Hues a remarca cu Polis a confisca 282 kilo di marihuana na e cas di V. Segun V., e no a haya pago. El a splica Hues cu e Jamaiquino tabata yam’e y bis’e cu tin hende ta bay busca droga. E persona tabata WhatsApp V. y V. tabata hiba e paki di droga na e persona y e persona ta paga. Despues e Jamaiquino tabata busca e placa serca V.
Hues a mustra cu Polis a haya un schrift cu anotacionnan di droganan cu tabata wordo busca y cuanto droga y cuanto placa. V. a bisa Hues cu el a hacie door di necesidad di placa pa paga school pa su yiunan. Hues a bisa cu e total di droga ta mas o menos 1 miyon Florin. Ta calcula cu original tabatin 350 kilo di marihuana y un parti ya a wordo entrega caba. Ta asina cu J. tambe a bay 6 biaha busca paki di droga for di V. Hues a bisa cu tin 4 hende ta bisa cu a cumpra for di J. Segun J. e no tabata bende. E tabata yuda nan haya e droga.
Fiscal: E momento ey, Fiscal a bisa Hues cu dia 21 September 2025, Polis a detene J. cu tabatin marihuana den su poder. Den J. su smartphone a mira potretnan di bultonan di marihuana. A haya chat den J. su smartphone cu e muhe V. Investigacion a mustra cu e droga tabata warda na un cas na Zeewijk unda V. tabata keda. Despues a bay na e cas unda V. a keda. A haya 506 paki di droga y tambe un schrift di administracion cu V. tabatin. Fiscal a bisa cu en total mas di 285 kilo di marihuana a keda confisca. Tanto J. como V. a admiti. V. su funcion tabata pa warda e droga y tene administracion di e droga y placa. J. tabata transporta droga pa hende. Na opinion di Fiscal, en total ta 6 biaha J. a bay busca droga for di V. y hiba pa otro. En total 139 paki di droga J. a bay entrega.
Fiscal ta haya cu nan ta complice di posecion, transporta y bende droga. El a sigui bisa cu cada un tabatin un funcion den e asunto aki. Fiscal a mustra cu e usamento di marihuana ta causa adictonan di droga cu ta crea criminalidad y miseria den famia.
Fiscal a exigi a base di maneho di Hulanda, pa V. 30 luna di prizon y pa J. 18 luna di prizon. Fiscal a bisa cu e placa cu a keda confisca na cas unda V. tabata keda y e schrift mester keda confisca. Pa loke ta J., e placa, e smartphone y tas cu droga ta keda confisca.
Abogado: Aki abogado mr. Canwood a bisa Hues cu J. a admiti tur cos y no tabata haya pago sino un tiki marihuana pa su mesun uso. E abogado a mustra cu ta promer biaha cu J. ta cay cera y su funcion den e caso aki tabata transporta e droga y a laga e Venezolano y Jamaiquino papia. E abogado ta haya cu J. y V. a wordo usa pa e Venezolano y Jamaiquino. E abogado a bisa cu e placanan cu a haya di J., ta placanan di tips cu e tabata haya di su trabao na hotel. El a pidi Hues pa J. por haya e placa. Abogado ta haya e castigo exigi pa Fiscal ta na su lugar.
Abogado mr. Kuster a bisa Hues cu V. a admiti tur cos. E tambe no tabata bende sino a wordo usa pa warda e droga y haci administracion. Na opinion di mr. Kuster, J. y V. a wordo usa pa hendenan cu ta experencia pa esaki. El a bisa cu V. a wordo priminti 5 mil Florin pero V. no a haya esaki. E abogado a bisa Hues cu e placa cu Polis a confisca ta placa cu V. a gana como waiter y el a pidi Hues pa V. haya e placa bek y ta laga e decision di castigo den man di Hues.
Sentencia: Hues a sera tratamento di e caso y a pospone e caso pa bay analisa y pensa. Despues di un rato Hues a bolbe y a dicta sentencia di biaha. Hues ta haya legalmente proba cu J. y V. ta complice di bende, transporta y posesion di marihuana. Hues a bisa cu e comportacion aki, J. y V. a mantene e circulacion di marihuana. Hues a bisa cu e ta tene cuenta cu maneho di Corte.
El a mustra cu segun maneho, pa un mula di 25 Kilo di marihuana ta 21 luna di prizon. Sinembargo, Hues a confirma e exigencia di Fiscal pa J. y V. Hues a hala nan atencion cu en realidad e castigo mester ta hopi mas severo. Pa loke ta e placa, smartphone y schrift, Hues a bisa cu nan lo keda confisca.
