E victima a sufri un tiro den man
ORANJESTAD (AAN): Diabierna mainta via video conference, Hues a dicta sentencia den e caso penal cu Ministerio Publico a cuminsa contra e homber S.S. di 21 aña di edad. Hues a confirma punto di bista di Fiscal esta cu no ta haya S.S. culpable di intento di mata pero si intento di causa herida severo. Fiscal a exigi 3 aña di prison y Hues a condena S.S. na 3 aña di prison di cual 6 luna ta condicional.
E acusacion cu Fiscal a presenta durante tratamento di e caso contra S.S. ta, cu riba November 2021 el a purba mata un persona y posecion di arma di candela Baretta. Fiscal a bisa cu S.S. a tira riba dos persona M. y K. caminda K. a resulta herida na man.
Exigencia Fiscal: Algun siman pasa tratamento di e caso a tuma lugar caminda Fiscal a bisa Hues cu a keda proba cu S.S. a tira. E no ta haya cu aki por papia di defensa propio. Fiscal a mustra cu na dado momento durante un discusion, S.S. a saca arma y los tiro. Un bala a herida e homber K. na su man y un otro bala a dal contra e auto den cual e dama M. tabata sinta.
E ta considera esaki un intento di maltrato severo. Fiscal a pidi Hues pa declara S.S. liber di intento mata.
El a bisa den Corte cu ora un persona tira di cerca riba un otro persona, e chens ta grandi cu por herida e persona severo. E ta mira cu K. a coy machete pero no ta mira cu K. tabata ataca e mama di S.S. Fiscal a bisa cu den e situacion aki, S.S. por a tira den halto of cana bay pero no bay tira riba e homber K. Pa cu e castigo, Fiscal a bisa cu e ta tene cuenta cu tabatin un discusion cu a sali for di man. Fiscal a tuma S.S. na malo cu e tabatin un arma y a tira.
El a tene cuenta cu S.S. ta hoben y ta promer biaha cu e ta cay sera. Fiscal a exigi 3 aña di prison, kitando e tempo cu S.S. ta sera den KIA. Tambe Fiscal a exigi pa destrui e arma y balanan. E auto confisca lo mester bay pa e doño, kende no ta S.S.
Sentencia: Diabierna mainta Hues a bisa cu e no ta haya, proba mescos cu Fiscal, e acusacion di intento di mata. Hues a bisa cu e si ta haya proba, manera Fiscal a bisa, purba lesiona e homber K. door di tira y herida. Na opinion di Hues, no a keda proba cu S.S. a purba herida e dama M.
Hues a bisa cu ta conoci cu arma ta causa problema. Hues a mustra cu S.S. a bisa a tira riba K. pasobra K. a menaza su mama cu machete. Hues a rechaza esaki pasobra na opinion di Hues, e momento ey ya e mama a core bay. Hues ta haya cu S.S. por a tira den laira tambe.
Castigo: Pa cu e castigo, Hues a bisa cu e ta tene cuenta cu e seriedad di e caso. El a bisa cu S.S. tabata cana arma y a tira riba K. El a tene cuenta cu ta promer biaha cu S.S. ta cay sera.
Tambe Hues a tene cuenta cu e edad hoben.
Hues a condena S.S. na 36 luna (3 aña) di prison di cual 6 luna ta condicional cu 2 aña di prueba. Durante e 2 aña di prueba, S.S. ta cay bou guia Reclasering. Hues a duna orden pa destrui e arma y e auto lo mester debolbe na e doño.
