Aunke cu Fiscal ta haya cu e sospechoso ta culpable di causa morto
ORANJESTAD (AAN): Diahuebs mainta despues di discusion interesante entre Fiscal y abogado mr. D.Croes, Hues a declara e dama M.L. liber di e acusacion, cu riba 27 Maart 2020, door di su culpa a causa morto di e homber D.S. Pop naci dia 11 Juli 1968 na Curaçao, pues tin 51 aña di edad.
A sosode un accidente riba Watty Vos Boulevard for di e rotonde nobo na Ponton bayendo pa rotonde nobo na Tanki Leendert, caminda M.L. a dal D.S. Pop y despues di mas o menos 1 ora S. Pop a fayece na hospital.
Accident tragico: Den sala di Corte tabata presente M.L. y su casa. Hues a puntra M.L. kico a sosode. M.L. a splica Hues cu e dia ey mainta el a lanta pa bay haci compras na Price Smart. E tabata coriendo riba Watty Vos Boulevard caminda tabatin un auto ta core su dilanti y na dado momento el a mira cu e auto a kita na man robez. M.L. a mira cu tin mas o menos 4 hende ta trahando cu Bobcat ariba e caretera. Esey a haci cu e tambe a kita y na dado momento ora e tabata bayendo bek na man drechi, el a mira un sombra dilanti su auto y a tende un sla na e auto.
Chauffeur M.L. a spanta y primi brake. El a bira panico, sende luznan di señal, sali for di auto y mira e homber Pop ainda na bida benta abao dilanti e auto. M.L. a yama un colega di Cruz Cora, kende a presenta y nan a cuminsa traha cu e victima promer cu ambulance a yega.
E chauffeur M.L., kende ta un voluntario di Cruz Cora pa mas cu 20 aña, a bisa Hues cu e tabata paga tino riba trafico y no a spera cu diripiente un hende ta bin dilanti su auto. Hues a bisa cu tin testigo a bisa cu a mira e victima tabata cana ariba e separador (acera mey-mey di e caretera) cu na 2020 ainda tabata djis sero di santo, y el a trompeca dos biaha.
Hues a mustra cu tin sla na banda drechi di auto y posiblemente e victima a bini na banda. Chauffeur M.L. a bisa cu e tabata core mas o menos 60 km/h y cu tabatin un otro auto su dilanti. Hues a bisa cu for di potretnan por mira cu e caminda no tabata completamente cla. Tabatin santo y no tabatin na banda caminda pa hende ta cana.
Chauffeur a keda afecta: Segun acusado M.L. a bisa Hues cu despues di e accidente tragico, el a keda lunanan largo malo y bao tratamento. E mester a haya pilder pa por drumi. El a bisa cu pa hopi tempo e no por a core auto riba Watty Vos Boulevard mes. Solamente si e ta necesario e lo core.
Cu un tristeza y na yoramento el a bisa cu e tin cu biba cu e tristeza aki pa resto di su bida. El a bisa cu e tabata kier a bay entiero di D.S. Pop pero el a worde avisa pa no bay.
Fiscal ta haya chauffeur culpabel: Fiscal a bisa Hues cu ta importante pa bisa adelanta cu no ta acusa M.L. di a mata Pop. E acusacion ta door di no a paga suficiente tino, M.L. a causa accidente cu consecuencia cu Pop a fayece. Esaki, na opinion di Fiscal, ta worde considera cu door di culpa di M.L. a causa morto di Pop.
Fiscal a bisa cu chauffeur M.L. no a paga suficiente tino pa mira cu e victima tabata riba caminda. Na opinion di Fiscal, tin testigo P. a bisa cu trafico tabata hopi trankilo y diripiente el a tende sonido caminda Pop a worde gedal door di un auto y e chofer no a brake. Fiscal ta haya cu M.L. mester por a mira Pop, cual e no a haci.
El a remarca cu si M.L. a mira esnan cu tabata haci limpieza riba caya, e mester por a mira Pop. Fiscal ta haya cu door di no a paga suficiente tino, M.L. no a mira Pop. E ta haya M.L. culpable di causa morto door di culpa. E ta un caso hopi tristo.
Fiscal ta conciente cu ta duel M.L. hopi loke a sosode. Fiscal a exigi 80 ora di trabao pa comunidad y si no cumpli cu esaki lo mester bay 40 dia sera den prison. Tambe Fiscal a exigi 1 aña condicional sin por core cu un tempo di prueba 2 aña.
Abogado: mr. D. Croes a bisa Hues cu M.L. durante e ultimo 2 aña tabatin momentonan dificil. El a bira hopi malo door di e accidente. El a bisa cu M.L. a keda sorprendi cu Fiscal a bin cu un caso penal. E abogado a bisa Hues cu Polis a bisa M.L. pa no worry pasobra e no tin culpa. E abogado a mustra cu segun investigacion di Polis, Pop tabata cana riba e pida separador (mey mey di e caretera) y a trompeca y e peaton a bin cay riba e caretera.
E abogado a bisa Hues cu e testigo P. a bisa cu el a tende un sonido y ora el a bira, el a mira cu Pop a worde gedal. Con e por bisa cu e chofer no a brake si e accidente a sosode caba?
E otro testigo M. a bisa cu el a mira Pop ta cana riba e sero di separador mey mey di e careteranan y cu dos biaha el a trompeca y e ultimo el a slip cay dilanti e auto.
E abogado a bisa cu riba e caretera Watty Vos, tin zebra pad cu ta e lugar unda hende por cruza caminda y no for di e separador, esta e sero mey mey di e caretera. Na opinion di e abogado, ta esnan cu tabata traha riba caminda, sin ningun borchi, a causa tur cos. E auto dilanti di M.L. a desvia di biaha y M.L. su tras tambe a desvia y diripiente a haya e impacto.
E abogado a remarca, con Fiscal ta bisa cu M.L. mester por a mira Pop, si diripiente e mester a desvia pa e trabaonan riba caminda. Ta diripiente Pop ta trompeca for di e sero mey mey di e caretera y a slip cay dilanti na banda drechi di auto di M.L. E abogado ta haya cu M.L. no tin culpa. El a bisa cu M.L. tabata core trankil y conciente. Pesey esaki ta worde considera como accidente.
Abogado mr. Croes ta haya e castigo exigi pa Fiscal no ta corecto. El a pidi Hues pa declara M.L. liber.
Hues a declara liber: Hues a sera tratamento di e caso y a bisa cu e ta dicta sentencia di biaha. Hues ta haya cu ta un hecho cu tabatin hendenan ta traha riba e caretera. M.L. no tabata core duro y no tabata core iresponsabel. Ta un hecho cu Pop tabata riba e sero mey mey di e caretera.
Chauffeur M.L. a kita pa core poco poco pa e trahadornan. Hues no ta comparti punto di bisti di Fiscal cu M.L. mester por a mira e victima. El a bisa cu tin testigo a mira cu e victima a trompeca for di e sero. Na opinion di Hues, ora bo ta core riba un caretera, bo no por spera cu diripiente hende ta subi caminda.
Hues ta haya cu M.L. no tin culpa. Hues a bisa cu Pop no mester tabata riba e caretera. Hues a declara M.L. liber. Por a mira M.L. hopi emociona a brasa su casa na final den Sala di Corte.
