Abogado mr. Illes den caso Avestruz
ORANJESTAD (AAN): Dialuna tabata un dia hopi largo pa cu tratamento di apelacion caso Avestruz. Despues cu henter parti mainta a scucha Procurador General (PG) su opinion riba e caso y a exigi castigonan, merdia a sigui cu defensa di Sevinger y Susebeek.
Den e articulo aki ta publica e defensa hiba pa abogado mr. Illes cu a defende Pieter Susebeek.
No a paga pa haya tereno: mr. Illes a bisa Hof cu no tin relacion chronologico cu Susebeek a duna regalo na Sevinger pa haya opcion di tereno. E abogado a mustra cu e peticionnan di compania PATS di Susebeek no tin nada di haci cu cumpramento di e machine di gym, cumpramento di drip system na Fantastic Garden.
No tin yamadanan cu ta mustra cu Susebeek a paga pa haya tereno.
E abogado a mustra cu segun ley, e hecho di cumpra un empleado di Gobierno, mester tin relacion cu a haci algo contra su trabao. Susebeek y Sevinger ta amigo di otro hopi mas promer cu Sevinger a bira minister. E donacionnan di Susebeek no tabata pa haya fabornan di Sevinger. No por bisa cu pagonan cu Susebeek a haci ta pa haya fabornan di Sevinger.
E abogado a señala cu Procurador General (PG) a purba haci esaki. mr. Illes a bisa Hof cu e pagonan di machine di gym y drip system ta asuntonan priva entre Susebeek y Sevinger y no tin nada di haci di cumpra Sevinger pa haya fabornan. Na opinion di mr. Illes, e relacion di amigo no mester mira como cumpra pa haya fabornan.
Sospecho falso riba sevinger: mr. Illes a mustra cu LandsRecherche tabata sospecha cu e 2.4 Miyon na Curacao no ta di Susebeek sino di Benny Sevinger. Pero nada di e sospecho aki ta berdad. Susebeek y Sevinger ta hopi bon amigo y nan ta yuda otro.
LandsRecherche y Ministerio Publico por ta pensa otro riba e amistad. Nan lo por pensa cu Susebeek a cumpra Sevinger pa haya terenonan pero esey no tin sentido.
Sevinger no a favorece Susebeek: E abogado a sigui bisa cu no tin ningun indicacion cu Sevinger a duna previlegio na Susebeek. Hues den Promer Instancia, ta contradeci esaki den e sentencia. Sevinger a firma cada peticion pa tereno sin mira ta kende e persona ta. Tur peticion cu a yega, el a aproba y manda DIP pa sigui e proceso.
Pa algo mas di 8 aña, Sevinger a keda usa e mesun sistema. E abogado ta haya cu Sevinger a hiba un maneho transparente pa stimula economia y construccion. Sevinger no mester haya regalo pa aproba peticion pa tereno. E tabata firma tur peticion.
Expresionnan inhusto contra Susebeek: mr. Illes a bisa Hof cu no tin prueba cu Susebeek a cumpra Sevinger. El a mustra cu den Promer Instancia, Ministerio Publico a purba ataca Susebeek door di bisa cu Susebeek tin hopi placa y tin hopi compania. E abogado a bisa Hof cu Susebeek no a bira rico door di Sevinger. Susebeek no a haya previlegio.
E abogado ta haya tur e expresionnan aki ta inhusto y no corecto. Na opinion di mr. Illes, si Hues no por compronde cu amigonan ta yuda otro sin spera algo back, esey ta un forma di pensa robez. El a bisa cu hopi hende ta yuda otro.
No a cumpra Sevinger: Den e caso di drip system, Susebeek a paga y Sevinger a deposita placa riba cuenta di e compania di Susebeek. Mr. Illes a mustra cu Hues a mustra cu e pagonan na Fantastic Garden, e mesun dia placa a worde deposita di e mesun suma door di Sevinger. Administracion di PATS ta mustra cu Sevinger a paga mesun cos cu loke PATS a paga Fantastic Garden.
Corectamente Hues a declara Susebeek liber di e acusacion aki. E pagamento di e cura di Aluminium ta mesun cos. Ta despues di e pagamento, Sevinger tabata paga. En total mas cu 22 mil Florin incluyendo e transporte for di Miami. Sevinger a haci pagonan di 21 mil Florin na PATS. Tin raport financiero di compania cu ta demostra esaki pero asina mes PG no ta kere.
E machine di gym a worde cumpra na 2017 door di un compania di Susebeek. E compania di cura di Aluminium a haci oferta riba nomber di Sevinger pero e cobranza a bay riba nomber di compania di Susebeek. E machine ta di Susebeek pero door cu e gym di Susebeek ta chikito, a hiba esaki na Sevinger temporal. Door di nan amistad, e machine ta na Sevinger. No por papia aki di a cumpra Sevinger. E abogado ta haya cu mester declara Susebeek liber.
Cuestiona LandsRecherche su investigacion: mr. Illes a cuestiona e ponencia di PG cu Susebeek ta haya tur cos door di haci peticion na Sevinger cu ta firma tur cos. E abogado a mustra cu a dura hopi promer cu e companianan di Susebeek a haya terenonan erfpacht comercial. E ta haya cu PG kier pinta Susebeek y Sevinger scur den comunidad.
- Illes a mustra cu tin un schema cu den e ultimo lunanan di Sevinger a regla terenonan. Sinembargo esey no ta asina. Di PATS su tereno ta for di 2012 duna, otro compania a haya na 2015, e otro compania na 2016, a haya tereno, e otro compania na 2017.
Tin otro compania menciona pero no ta di Susebeek. Mr. Illes ta haya cu LandsRecherche kier duna un impresion malo di Susebeek. Mr. Illes a bisa Hof cu un inversionista manera Susebeek, ta usa companianan pa haya tereno pa proyecto. Esaki no ta algo contra ley.
Susebeek inversionista pionero: mr. Illes a bisa Hof cu Susebeek ta un inversionista pionero den desaroyo na Palm Beach y a desaroya La Asienda cu ta un compleho shoppingmall y ta exitoso.
Awor PG kier pinta Susebeek di a bira rico door di Sevinger. Abogado ta haya cu no tin prueba cu Susebeek a cumpra Sevinger y pesey mester declara Susebeek liber.
Labamento di placa: Pa loke ta e acusacion di PG cu Susebeek a laga placa, mr. Illes a bisa Hof cu e hecho cu Susebeek a bende un tereno y e placa a worde deposita na un banco na Curacao, no por bisa cu esey ta labamento di placa.
Mr. Illes a mustra cu for di 2003 Susebeek a pidi tereno banda di waf. Diferente biaha a haci peticion. Na 2012 a bolbe haci peticion pa un tereno. Te na Augustus 2014 a haya opcion y na 2015 a haya decreto ministerial. Harms a haci un oferta di 2.4 Miyon Florin pa cumpra e proyecto y compania di Susebeek. E placa a worde deposita na Orco Bank, Curacao.
E abogado ta haya cu no por papia aki di desfalco. Susebeek tabatin planea un centro comercial y a haya e oferta di Harms. 762 meter ta e tereno. Harms a haya un tereno mas di 368 meter. No por bisa aki di desfalco y tampoco labamento di placa. E abogado ta haya cu mester declara Susebeek liber.
