Abogado mr. Kock ta mustra cu un moneda tin dos banda
ORANJESTAD (AAN): Dialuna, despues cu Procurador General (PG) mainta a presenta su requisitorio y a exigi castigo pa e 7 acusadonan cu a apela nan sentencia, merdia mr. D. Kock, a presenta su defensa pa Sevinger.
Sevinger no a favorece esnan liga cu AVP: mr. Kock a bisa Hof cu un moneda tin dos banda. El a bisa cu a scucha e banda di PG y awor ta scucha e banda di Sevinger. E abogado a bisa Hof cu Sevinger tabata minister di infrastructura y no comercialisacion. E tempo ey a confronta e crisis economico mundial y a bin cu plan pa drecha economia di Aruba. Pesey a bin cu erfpacht comercial. mr. Kock a sigui bisa cu Sevinger tabata haya mas di 100 peticion y documentonnan pa dia pa firma. Pesey Sevinger tabata confia den e departamentonan encarga cu dunamento di tereno.
Sevinger tabatin “open door policy” y masha hopi hende a acerk’e pa laga e proceso di haya tereno cana.
- Kock a mustra cu di parti di Hulanda ta mira esaki manera cu Sevinger tabata favorece esnan liga cu AVP pero no ta asina. Na opinion di mr. Kock, segun ley, bo no mester ta na DIP pa duna un peticion pa tereno sino cerca Minister. E abogado a bisa Hof cu PG ta cuestiona Sevinger di ta favorece hende siendo cu ley ta bisa cu ta Sevinger mester haci esey.
Acusa Sevinger pa algo cu no ta castigabel: E abogado a remarca cu PG ta bisa cu Sevinger no tabata controla e peticionnan y tabata djis firma. Segun abogado, a base di ley Sevinger ta esun cu mester firma e peticion y despues DIP lo sigui cu e proceso.
Inhustamente ta acusa Sevinger pa algo cu no ta castigabel. mr. Kock a bisa Hof cu durante tratamento di e caso Den Promer Instancia, e Hues a cualifica Sevinger como un machine di stempel. Den Corte Superior, Hof a puntra Sevinger con e ta haci su trabao. Segun e abogado, esey ta pasobra cu Sevinger kier a hiba un maneho pa trece bida den economia.
Ningun hende Sevinger a nenga di firma. PG no por a demostra ningun caminda cu Sevinger a nenga di firma peticion pa tereno. E 400 peticionnan cu Sevinger a logra demostra, 100 no a haya tereno. Esey ta mustra, contrario na loke PG ta bisa, cu ta DIP ta screen.
Deshaun y Elenath: mr. Kock a bisa cu den e casonan Deshaun y Elenath, e persona a haci peticion y a haya tereno. Te dia di awe e proyectonan ta hiba e nomber Deshaun y Elenath.
- Kock a bisa cu Sevinger no tabata envolvi den nada sino Every cu tabata e man drechi di Sevinger cu tabata haya yamadanan di Arends y hasta a traha documentonan di Arends y hiba pa Sevinger firma. Tabatin un relacion entre Every y Arends cu a trece cun’e cu Arends a haya e terenonan.
E abogado ta haya cu Sevinger mester worde declara liber. E director di Deshaun tabata e dama W. y Elenath e homber F. Ningun caminda tin nomber di Arends. mr. Kock a remarca, con Sevinger por sa cu ta Arends ta pidi tereno. E no tabata sa cu nan intension tabata pa bende tereno. Ni DIP a investiga esaki. E abogado ta haya e acusacion contra Sevinger no funda.
Testigo ta gaña cu Arends a paga Sevinger: mr. Kock a bisa cu e unico prueba cu PG tin cu a paga Sevinger, ta declaracion di Roja. E abogado a mustra cu a base di ley, 1 testigo no ta suficiente. Hues den Promer Instancia a rechaza esaki y a declara Sevinger liber di e acusacion cu a paga Sevinger. E señora di Sevinger a bisa cu el a duna Roja un envelop pa Arends y ta loterianan di Miami cu a manda pa Arends.
E ta haya cu PG a bruha cos pa laga mustra cu ta Arends a manda placa pa Sevinger, cual no ta asina. Na opinion di mr. Kock, Roja ta gaña.
Pakico PG no a apela contra Abath y Every: mr. Kock a bisa Hof, con por ta cu Abath y Every ta worde declara liber y PG no ta apela. Con por ta, siendo cu ta Abath ta esun cu ta evalua e peticionnan pa haya tereno y Every a traha concepto pa Arends.
E abogado a remarca cu no tabatin grupo selecta manera PG ta pretende. El a bisa cu e Hulandes cu a pidi pa e mesun tereno na Sasaki, Sevinger a firma e peticion y manda DIP.
Culpa Abath di DIP: Pa loke ta e caso Damira y Lizner, mr. Kock a bisa Hof cu nan a haci peticion pa haya tereno. No tin ningun indicacion cu Sevinger a previlegia nan. Sevinger a firma e peticion y manda DIP pa sigui e proceso. Cu Werleman, Nuñez y Mansur a sera cabez pa bende terenonan, Sevinger no tin nada di haci cu esaki.
E abogado ta haya cu ta Abath mester a haci control y bin cu e exigencianan pa yega na opcion pa tereno, pero PG ta culpa Sevinger. A declara Abath liber pa tur e acusacionnan aki, siendo cu ta Abath ta esun na DIP cu mester regla tur cos. Mr. Kock a bisa Hof cu no ta algo castigabel cu e terenonan a worde bendi. Sevinger no tabata sa di esaki. Mr. Kock ta haya cu mester declara Sevinger liber den esaki mescos cu Hues den Promer Instancia a haci.
“Cumpra Sevinger”: Pa loke ta e acusacion cu a cumpra Sevinger, mr. Kock a bisa Hof cu segun ley, si bo a djis tuma algo, esey tin castigo di 3 luna di prison. Pero si a tuma algo y a haci algo contra bo responsabilidad, e ora ey tin castigo di 4 aña di prison. mr. Kock a mustra cu e contribucion na FCB di Sevinger na 2013 no ta cumpra Sevinger pasobra e tabata pa campaña di eleccion y no cu a haci donacion adelanta pa 2016 ora a haci peticion di tereno erfpacht comercial.
Na opinion di mr. Kock, PG ta mustra cu ta Harms ta doño di e companianan, pero esey no tin nada di haci cu e donacion na fundacion. E abogado a menciona decision di Corte na Hulanda caminda ta mustra cu partidonan politico por haya donacionnan y no necesariamente por bisa cu e minister a worde cumpra. No por ta asina cu na Hulanda e no ta castigabel pero na Aruba si.
Susebeek: Mr. Kock a mustra cu PG ta bisa cu Susebeek a haya 11 tereno pero esey no ta berdad. Ta 4 tereno so Susebeek a haya. Su yiunan y su defunto mama a pidi tereno, pero eseynan no ta di Susebeek.
E abogado a bisa Hof cu Susebeek a yuda su amigo Sevinger cumpra cosnan pasobra Sevinger no sa unda pa cumpra. No ta straño cu Sevinger ta pidi su amigo di hopi tempo pa cumpra e cosnan y despues Sevinger a paga. Segun e abogado, tambe tin situacion cu Sevinger a duna Susebeek placa pa cumpra cosnan. El a mustra cu Susebeek no tabatin necesidad pa cumpra Sevinger pa haya tereno. Susebeek tabata haci peticion manera tur otro hende y Sevinger a firma mescos cu tur otro.
Pa loke ta e machine di Gym pa train, Sevinger a recomenda un machine na Susebeek y e lugar na Merca a manda un oferta pa Sevinger pero no recibo. Ta Susebeek a haya e recibo y a resulta cu e machine ta mucho grandi pa Susebeek su gym. Mr. Kock ta haya cu esaki no ta cumpra Sevinger. Ta un hecho cu a hiba e machine na Sevinger pero no ta asina cu Susebeek a cumpra e machine pa Sevinger.
E abogado a sigui bisa cu 20 December 2015 Cristine Estate di Holiday Inn hotel, a haci peticion na Sevinger pa expande e hotel den e prolongacion di erfpacht.
- Kock a bisa Hof cu abogado mr. Sjiem Fat ta un di e abogadonan cu hopi experencia y PG ta bisa cu el a palabra kico pa papia cu Cristine Estate. Esey no ta asina. E abogado a bisa Hof cu Sevinger a firma aprobacion pero ta mustra cu mester bay DIP pa sigui e proceso. Dos aña despues, na 2017, a haci donacion na Fundacion Curazon Berde. El a mustra cu Lowenstein a paga pa evita cu e ta worde persigui y haya mal umber den e mundo hotelero.
Mal uso di funcion: Pa loke ta e acusacion di mal uso di funcion, mr. Kock a bisa Hof cu e no ta haya cu Sevinger a favorece ningun hende. El a bisa cu Sevinger a firma peticionnan y manda DIP manera el a haci tur momento.
Malversacion: Riba e acusacion di malversacion di placa, mr. Kock a bisa cu e no ta haya cu Sevinger a malversacion placa di Fundacion Curazon Berde. El a mustra cu segun ley, un persona por malversa placa cu e tin den su poder. Den e caso aki Sevinger no ta director di e fundacion. Esey kiermen cu e no tin poder riba e placanan. Esey ta nifica cu no por papia di malversacion.
E hecho cu a laga paga ticket pa Sevinger y su señora viaha bay Miami, no ta malversacion. E president di e fundacion a traha un cheque y manda pa e compania pa cumpra e ticket. Ningun rato Sevinger a haya e cheque pa bay cumpra ticket. Ademas, Sevinger tabata paga gastonan di huur di oficina cash. E abogado ta haya cu e ticket ta un pago di un parti di loke Sevinger a paga pa oficina pa algun luna. Esey no ta malversacion. E ta haya cu mester declara Sevinger liber.
Persecusion politico: mr. Kock a finaliza bisando cu henter e caso ta un persecusion politico. A bay haci investigacion na cas di Sevinger, keriendo cu lo haya toilette di oro, placanan dera den cura. Pero nada di esey a haya. Na opinion di mr. Kock, Sevinger ta un simpel persona cu ta trahando ainda riba su cas.
