Sospechoso yorando bisando cu accident a dal’e duro pasobra a causa morto di su amigo  

Fiscal a exigi 4 aña di prison y 5 aña sin rijbewijs

• Tin monton di video confirmando cu tabata pusta di Balashi caba
• Su rosea a registra 400 µg/l di alcohol cu ta algo halto 

ORANJESTAD (AAN) E homber Eugene E.E. Lacle di 24 aña, a presenta dilanti Hues pa duna cuenta di e delito serio cu el a haci. E ta worde acusa cu riba 18 di Maart 2024, e tabata core na un forma irresponsabel y a ocasiona un accidente di trafico fatal na Savaneta.

   E auto compacto Nissan March cu Lacle tabata core a dal contra e brommer cu e defunto Hernandez Pinedo q.e.p.d. tabata core. E impacto tabata asina duro cu e brommer a explota y e victima Hernandes Pinedo a fayece. Tratamento di e caso a dura practicamente henter mainta.

   Den sala di Corte tabata presente famia di Lacle y famia di e victima. Fiscal a acusa Lacle di tabata core auto sin rijbewijs, core bao influencia di alcohol y core duro.

   Sospechoso a yora y pidi sorry: Ora Hues a cuminsa haci pregunta na Lacle, Lacle a lanta para y cu wowo na awa el a pidi sorry na e famia pa loke a sosode. El a bisa Hues cu e conoce Hernandez Pinedo for di chikito y cu e conoce mayoria di e famia. Lacle a bisa Hues: “E cos aki a dal mi duro”. El a admiti di a core duro, core sin rijbewijs y core bao influencia di alcohol.

   Na yoramento el a bisa Hues cu tur dia cu e lanta, e ta pensa riba e accidente y esaki ta traha hopi riba dje. El a bisa cu e ta pidi Dios gui’e. El a bisa cu e tin un yiu chikito y e cos aki ta dal’e duro. E mama di Lacle tabata yora den tribuna ora cu Lacle tabata papia.

   Accidente fatal: Hues a bisa cu e ta compronde cu e caso ta duro. Hues a bisa cu Lacle a bisa cu el “a bebe algun cerbez so” y ora un cerbez a basha riba su paña el a dicidi di bay cas. Segun Lacle, el a haci test di supla y e test sali cu nivel di µg/l alcohol den su rosea ta halto.  Pero na su opinion, e no tabata burachi y cu e tabata core 80 km/h. Na Savaneta entre sucursal di Nagico y establecimento di Home Fun Super, ora el a bay pasa un truck grandi, el a hay’e cu e brommer ta bin den direccion contrario. El a purba di kita pero no por a evita e impacto.

   Lacle a bisa cu el a baha for di auto y e chofer di e truck a puntr’e si e ta bon. El a bay wak e victima y a mira cu ta su amigo Hernandez Pinedo el a dal y cu e victima a fayece.

   Hues a bisa cu segun investigacion di Polis usando grabacionnan di video eybanda, Lacle tabata core entre 115 pa y 120 km/h. Lacle a bisa Hues cu ora el a bay pasa e truck el a subi velocidad. El a sigui bisa cu ora el a pasa el a mira algo ta bin y a purba kita pero tabata laat.

   Pustamento: Fiscal a mustra cu e homber W. tabata coriendo auto, a declara cu e tabata core tras di Lacle for di Mahuma y banda di rotonde Pos Chiquito hendenan sinta patras den e auto di Lacle a saca man for di bentana y tabata haci señalnan. Tambe cu Lacle a sende lusnan hazard. Lacle a bisa Hues cu e no a mira hende saca man for di bentana y por ta cu accidental su man a dal e boton di hazard. El a bisa cu e no conoce W. Hues a bisa cu W. a kere cu Lacle tabata kier a pusta cune. Segun Lacle, e no a pusta cu W. y tabata core 80 km/h.

   Video di accident pasa den Corte: Fiscal a pasa security camera video di e accidente den Corte. Ta asina cu durante e investigacion, a colecta video di seguridad di diferente lugar cu a haya na Savaneta. Riba e video, Fiscal a mustra con Lacle a pasa e truck cu velocidad halto y despues dal frontal contra e brommer. Esaki sosode 4.15’or di mainta.

   Fiscal a mustra cu e brommer tabata core cu luz sendi. Segun Lacle, ora e tabata pasando e truck, e no a mira nada. Fiscal a remarca cu Lacle tabata core auto cu stuurwiel na man drechi (RHD) y a bay pasa e truck sin cu e por wak trafico di contrario. Segun Lacle, el a kita un poco na man robez y ora el a mira cu no tin trafico, el a pasa e truck.

   Demanda daño: Abogado mr. Emerencia bisa Hues cu e mama di e victima y e pareha a haci demanda. Abogado bisa cu ayera 1 November, ta e victima su cumpleaños. Por a mira cu tanto e mama como e pareha tabata yora.

   E abogado a menciona 7 mil Florin di daño pa e brommer. Tambe el a menciona gastonan di entiero, pero no a menciona suma. Tambe el a bisa cu daño inmaterial, e mama a keda den trauma. E mama a keda depresivo y ta bayendo psycologo.

   Hues a puntra e abogado riba esaki y e mama na yoramento a bisa cu cada rato e ta corda con den e impacto, e brommer di su yiu a explota. Por a ripara cu e expresionnan di e mama a pone hopi cara den sala di Corte bira tristo.

   Abogado mr. Emerencia a sigui bisa cu e pareha di e defunto, e dama M.T. tabata na estado y e yiu a nace prematuro. E mester a keda hospitaliza y esaki lo por afect’e. E abogado a splica cu e dama M.T. mester a cuminsa un caso den Corte pa reconoce Hernandez Pinedo como tata di su yiu. E abogado a bisa cu e mucha a keda sin tata y e pareha kier demanda alimentacion te ora cu e mucha tin 18 aña. E abogado a bisa cu ta calcula 86 mil Florin y e demanda di daño ta 160 mil Florin.

   Mama di victima a papia: E mama di e victima a papia pa e pareha M.T. y su mes. El a lesa un carta cu M.T. a skirbi. Entre otro por a scucha e mama bisa cu M.T. a skirbi: “Bo a kita derecho di biba di tata di mi yiu. Mi nunca mas lo ta OK. Tin dia mi ta papia mi so pidi pa Hernandez Pinedo papia cu mi. E dolor no ta kita cu e realidad cu bo no tey mas. Ni kico worde dicidi, nunca mi ta haya mi guy bek”. Por a mira cu Lacle tabata yora ora e mama di e victima ta papia. E mama mes a expresa na yoramento: “E accident ta un impacto grandi pa mi”. Na yoramento el a cana bay sinti sin por a sigui expresa su mes.

   Fiscal: Fiscal a bisa cu dia 18 Maart, dia di himno y bandera, famia Hernandez Pinedo a sufri impacto, ora cu e victima a fayece den accidente trafico. Fiscal a bisa cu Lacle tambe ta afecta. E lo mester biba henter su bida cu el a kita bida di un persona door di a core irresponsabel den trafico. Na opinion di Fiscal, no por papia di intencional sino cu door di su culpa a causa un accidente fatal.

   El a mustra cu Diadomingo 17 Maart 2024 anochi, Lacle a sali cu algun hende y a keda te den oranan di marduga bishitando diferente lugar. Bayendo cas na altura di Savaneta, Lacle a bay pasa un truck y durante cu e tabata pasa a dal den un brommer maneha pa Hernandez Pinedo. Door di e impacto fuerte, e brommer a explota y Hernandez Pinedo a fayece.

   Tabatin un forma di pustamento: Fiscal a bisa cu tabata papia cu lo tabatin un pustamento a tuma lugar. Polis a busca y obtene diferente video di seguridad pa haci investigacion.

   Fiscal ta conclui cu tabatin manera un forma di pusta tabatin e marduga ey!  Videonan a mustra cu for di banda di rotonde Drive In cerca di Balashi, por mira cu e chofer W. tabata core den banda dilanti di Lacle. Fiscal a mustra cu for di Mahuma, W. tabata core tras di Lacle. Na Drive In na dado momento Lacle a pasa W. y Lacle a sende e luznan hazard, cu ta mustra cu ta pidi W. pa pusta. Fiscal a bisa cu e no ta kere Lacle cu accidental su man a dal na boton di hazard.

   Fiscal a sigui bisa cu riba videonan por mira cu Lacle a keda core dilanti di W., kende tabata core hopi pega tras di Lacle.

   Influencia di alcohol: Fiscal a mustra cu e cantidad di alcohol den rosea di Lacle tabata mas di 400 µg/l.  Esaki ta hopi mas halto cu loke ta stipula pa ley. Na opinion di Fiscal, e test di rosea ta mustra cu Lacle tabata bou influencia.

   Fiscal a mustra cu caminda cu Lacle tabata core, segun borchi mester core 60 km/h.  Lacle a bisa cu e tabata core 80 km/h, pero investigacion forensico di Polis ta mustra cu Lacle tabata core entre 115 km y 120 km/h riba e pida caminda ey.  Fiscal a bisa cu e impacto tabata asina fuerte cu e wiel di brommer a keda pega den e auto.

   Morto door di culpa: Fiscal ta haya cu tur cos ta mustra cu Lacle tabata core irresponsabel y door di su culpa a causa morto di e victima Hernandez Pinedo.

   Castigo: Fiscal a bisa cu Lacle a core sin rijbewijs, tabata core mas duro cu borchi ta mustra, a core bao influencia di alcohol. Tabata core auto RHD y a bay pasa un truck mientras brommer tabata bin den direccion contrario. Na opinion di Fiscal, esakinan ta motibonan di peso cu por haci e castigo subi mas. Tur esaki ta mustra cu Lacle a core iresponsabel y door di su culpa a causa morto di Hernandez Pinedo.

   Pesey Fiscal a exigi 4 aña di prison y pa kita rijbewijs pa 5 aña. Fiscal a bisa Hues cu e ta aproba e demanda di 7 mil Florin pa e brommer. Tambe el a aproba un demanda di 17.557 Florin.

   Pa loke ta e otro demandanan, Fiscal a pidi pa declara esakinan no admisibel. E ta haya cu no tin suficiente splicacion riba e sumanan aki y ta kere cu den un caso civil lo mester bay atende esakinan. Mescos e asunto di demanda di alimentacion pa e mucha. Fiscal ta haya cu den Corte Civil mester atende esaki.

   Abogado ta cuestiona aparato di Alco Sensor IV: mr. Kuster a bisa Hues cu for di investigacionnan por a mira cu Lacle a purba kita pa no dal contra e brommer. E abogado a bisa cu tin indicacion cu e brommer tabata core duro tambe. El a bisa cu no tabatin pustamento y e chofer W. cu tabata core tras di Lacle, a bisa cu nan no tabata pusta.

   Abogado a cuestiona si e test di supla pa alcohol ta confiabel. El a señala cu e gas di aparato di blaas su tempo di expira a pasa. El a bisa cu por ta cu e gas ta bon pero e machine no tabata bon calibra. E abogado a pidi Hues pa tene cuenta cu tur esaki y cu e caso aki a afecta Lacle masha hopi.

   E abogado ta haya cu mester declara algun di e demandanan no admisibel pasobra no tin raport di psychiater of psycologo. Esnan cu a worde paga door di AZV no por worde demanda. E ta comparti punto di bista di Fiscal pa declara e demandanan no admisibel.

   Fiscal a reacciona cu lo ta bon pa scucha experto riba instala gas riba aparato di test rosea di hende. Hues tambe a bisa cu el a ripara e fecha cu a expira y ta haya cu lo ta bon pa tin claridad riba esaki. Hues a pospone tratamento di e caso pa scucha e experto. Esaki lo sosode dia 15 November pa 11:30 am, y despues lo caba cu e caso penal pa e ora ey Hues fiha un fecha pa sentencia.