Hues a ordena pa Polis busca testigo importante pa interogacion
ORANJESTAD (AAN): Diabierna mainta e homber R.G. (52) a presenta dilanti Hues pa e caso penal cu Ministerio Publico a cuminsa contra dje. Promer cu tratamento di e caso, Hues a trece un punto di orden. El a bisa cu anterior, e abogado di R.G., mr. Rosenstand, a pidi pa scucha testigonan pero ta parce cu varios testigo no a presenta na Hues Comisario. Hues a dicidi cu mester interoga e testigo homber R. cu ta victima. Hues a pensa cu ta mihor pospone e caso te ora cu e interogacion tuma lugar. Tabatin un discusion interesante riba e peticion di abogado mr. Rosenstand pa laga su cliente R.G. liber pendiente di e caso. E abogado a logra convence Hues, kende a ordena pa laga R.G. ayera tardi liber pendiente di e caso.
PASA AUTO RIBA HENDE
E acusacionnan cu Fiscal di Ministerio Publico a presenta den sala di Corte contra R.G. ta:
Riba 21 Mei 2023, R.G. a purba mata e homber R. cu auto. R.G. a pasa auto riba R.
Fiscal ta acusa R.G. subsidiario di intento di maltrato severo.
Riba 21 Mei 2023, R.G. a manda auto riba e dama R.
R.G. a maltrata e dama R. cu un bate di baseball.
INTEROGA TESTIGONAN
Promer cu tratamento di e caso, Hues a bisa cu abogado mr. Rosenstand a pidi anterior pa scucha diferente testigo, entre otro e dos victimanan. Hues a bisa cu e dos victimanan no a wordo scucha ainda na Hues Comisario y tambe otro testigo. El a puntra e abogado si e kier scucha e testigonan. Abogado mr. Rosenstand a bisa Hues cu e kier scucha e dos victimanan como testigo. Hues a bisa cu e ta haya e victima homber R. ta un testigo importante pa e caso y lo ta bon pa interog’e. El a mustra cu Polis a yama R. pa duna declaracion, pero e no kier.
ORDENA POLIS PA BUSCA TESTIGO
Fiscal a bisa Hues cu 2 biaha Hues Comisario a manda yama e homber R. pa e wordo scucha. E testigo no a presenta. Fiscal a bisa cu lo mester laga Polis busca R. pa interogacion. Hues a sigui bisa si mester interoga R. den Corte mes of na Hues Comisario.
Fiscal a bisa, cu Hues por duna orden pa R. wordo busca pa Polis y hiba Hues Comisario pa interogacion.
Fiscal a bisa Hues tambe cu tin peticion di abogado mr. Rosenstand pa laga haci reconstruccion di loke a sosode pero esey ainda no a tuma lugar. Esey ta pasobra cu ainda e testigonan no a wordo scucha. Fiscal a puntra mr. Rosenstand si ainda e kier e reconstruccion. E abogado a bisa cu e kier e reconstruccion.
ABOGADO KIER PA CLIENTE BAY LIBER
Hues a propone pa manda e caso bek pa Hues Comisario scucha e homber R. y pa Polis trece R. na Hues Comisario. Hues a sigui bisa cu ta laga Hues Comisario dicidi si mester haci reconstruccion di e incidente. Esey ta trece cun’e cu no por trata e caso penal contra R.G. ainda. Abogado mr. Rosenstand a pidi Hues pa laga R.G. liber. Na opinion di abogado, tur testigo ta bisa cu ta door di e homber victima R., R.G. a actua. No ta asina cu R.G. a bay cu auto riba R. Ta R. a cana bay riba R.G. cu tabata den auto. Mr. Rosenstand a sigui bisa cu ta e dama R. a bay ataca R.G. y R.G. a actua pa defende su mes. E abogado ta haya cu R.G. ta encarcela inhusto y pesey ta pidi Hues pa lag’e den libertad bou condicion, te ora di tratamento di e caso.
Fiscal a reacciona cu e incidente a sosode riba caminda publico. E ta haya cu e caso ta mucho serio pa laga R.G. awor den libertad. El a pidi Hues pa rechaza e peticion di abogado.
HUES A LAGA SOSPECHOSO LIBER
Hues a pospone e caso un rato pa e evalua. Despues di un rato el a bolbe y a dicidi cu ta manda e caso bek Hues Comisario pa laga scucha e homber R. y pa Polis busca R. y hiba na Hues Comisario. Pa loke ta e peticion pa laga R.G. liber, Hues ta haya cu tin motibo di peso pa no laga liber. Pero mirando e hecho cu awor ta bay laga Hues Comisario scucha e victima R., lo bay tarda hopi promer cu tur cos ta cla. Pesey Hues ta honra e peticion di mr. Rosenstand y a ordena pa laga R.G. liber ayera tardi, pendiente di e caso. Hues a pospone e caso penal pa tempo indefini.
