Den lamentable caso di morto cruel di ciudadano Angela na Zeewijk
ORANJESTAD (AAN): Tres siman pasa, dia 7 November 2023, Hof di Corte Superior tabata na Aruba pa trata casonan di apelacion. Un di e casonan tabata esun di e morto cruel di defunto Frans Angela, caminda e pareha Walkidia Winterdaal di 35 aña procedente di Santo Domingo y e homber Jafet Cabrera Baez di 24 aña a apela contra nan sentencia di 18 aña di prison.
Algun dia despues, Hof a duna orden pa di inmediato laga Winterdaal liber.
Dialuna merdia, Hof a dicta sentencia den e caso, caminda Hof ta declara Winterdaal liber di tur e acusacionnan mientras cu Cabrera Baez ta worde declara liber di asesinato, mata intencional. Hof a condena Cabrera Baez na 14 aña di prison pa a mata na un forma cruel Angela.
PG a exigi hopi mas castigo: Den e sentencia por compronde cu dia di tratamento di e caso, Procurador General di Ministerio Publico (PG) ta haya e pareha culpabel di asesinato cruel di Angela riba e anochi di 17 pa 18 Maart 2022 y a exigi 22 aña di prison pa Winterdaal y 25 aña di prison pa Cabrera Baez.
Evaluacion di Hof: Hof den su evaluacion di e caso ta mustra cu riba e anochi di 17 pa 18 Maart 2022, Cabrera Baez a kita bida di Angela. Ta asina cu e pareha Winterdaal y Cabrera Baez a pidi Angela un lift pa San Nicolas. Winterdaal a sinta dilanti banda di Angela mientras cu Cabrera Baez a sinta patras.
Na dado momento Cabrera Baez a perde cabez y a gara Angela na su cabez y bira esaki cu forza tur banda. Esaki a causa cu e nek di Angela a kibra. Despues e pareha a saca e curpa for di e auto y a pasa auto riba dje diferente biaha. A pasa auto riba su cabez y curpa parti ariba.
No culpabel di asesinato: Hof ta haya cu no por bisa cu Cabrera Baez a asesina e victima Angela. Tampoco cu intencional a mat’e. Hof a declara Cabrera Baez liber di tur dos acusacion.
Hof ta mustra cu Cabrera Baez (Jafet), hunto cu su pareha Winterdaal a pidi un lift y a bay den auto di Angela, direccion San Nicolas. Winterdaal a sinta dilanti banda Angela y Jafet a sinta patras. Segun Jafet, Angela tabata papia na un manera grocero cu Winterdaal y na dado momento hasta a pone su man riba pia di Winterdaal. Esey a pone Jafet rabia asina hopi cu el a perde cabez. Jafet a gara Angela na su cabez y cuminsa drei cu forza den tur banda.
Winterdaal, na estado, tabata teme pa su mes y e baby. El a baha for di e auto y core bay. Despues di un rato e ta mira Jafet ta bin su direccion den e auto di e victima. El a subi den e auto y constata cu e victima tabata sin bida. Hunto nan a hiba e curpa banda di santana na Zeewijk. Ora di bay for di banda di e santana, Jafet a pasa cu e auto riba e victima.
Hof ta haya cu aki no por papia di asesinato pasobra Jafet no a pensa, si e ta bay mata of no e victima. Hof no ta haya cu dia 17 Maart 2022, Jafet y Winterdaal a subi den e auto di e victima Angela cu intencion di mat’e. Hof a mustra cu Jafet, na un momento a bisa Polis, cu e y su pareha tabatin e plan pa mata. Hof ta haya cu no tin siguranza cu ta asina y na ki momento Jafet realmente tabata kier a mata e victima.
Hof ta remarca cu Polis no a sigui interoga Jefat riba e parti di mata, door di cual e unico biaha cu Jafet a bisa esaki no ta duna suficiente indicacion con e matamento mester a sosode.
Jafet a perde cabez y mata e victima: Hof ta mustra cu e hecho cu e pareha a pidi e victima un lift, no por conclui cu nan tabatin un plan. Hof ta kere cu Jafet na dado momento a perde cabez, manera e mes a declara durante tratamento di e caso. Jafet a bisa Hof cu el a parde cabez ora el a mira cu e victima ta mishi cu su pareha na su pia.
No culpabel di mata intencional: Hof tampoco ta haya Jafet culpabel di a mata intencional. Na opinion di Hof, no a keda demostra cu e victima a fayece promer cu un asalto a sosode. Hof no ta haya cu Winterdaal a yuda den e asalto. Hof a mustra cu durante tratamento di e caso, Winterdaal a bisa cu ta berdad cu el a bisa Polis cu el a puntra Jafet si ta bay pasa auto riba e victima pa ta sigur cu e ta morto.
Winterdaal a splica Hof cu el a bisa Polis cu tur loke Jafet a bisa ta berdad. Esaki pasobra e stima Jafet y asina yuda Polis. Pero ningun momento el a bisa pa pasa e auto riba e victima. Esey na opinion di Hof no kiermen cu ta Winterdaal a bisa pa pasa e auto. Hof ta haya cu Jafet ta culpabel pa a mata.
Castigo: Pa cu e castigo, Hof a bisa cu e ta tene cuenta cu na un forma horoso a mata e victima Angela di 79 aña di edad. Hof a bisa cu Jafet a causa sufrimento irreparable na e famia di Angela. Ademas e lamentable incidente aki a sacodi henter comunidad.
Hof tambe a tene cuenta cu e raport di psychiater cu ta bisa cu door di e problema mental di Jafet, Jafet ta menos responsabel pa su actonan.
Hof a conclui cu Winterdaal ta worde declara liber di tur acusacion y cu Jafet ta worde condena na 14 aña di prison. E daño material ta keda 1.854,63 Florin. Hof a stipula e medida di pago cu ta nifica cu Jafet mester paga Ministerio Publico y Ministerio Publico lo facilita e placa na e famia.
