Wardacosta a tira riba boto pa par’e
- A keha dilanti Hues di maltrato enorme ricibi di Wardacosta
ORANJESTAD (AAN): Diabierna mainta e hombernan Venezolano J.B.R., J.P.G., A.H.A. y R.J.G. a haya un baño di awa frieu ora nan a scucha Fiscal exigi 7 aña di prison pa cada un. Nan tabata abordo di e boto cu Wardacosta a intercepta dia 23 Februari 2025 caminda a confisca 23 bulto di droga.
Wardacosta a tira riba motornan: Hues a bisa cu segun e relato di Wardacosta di Caribe Hulandes, dia 23 Februari 2025, a intercepta un speedboat tipo Go-Fast procedente di Venezuela. E miembronan di Guarda Costa a mira cu hendenan tabata tira bultonan di droga den laman y tabatin un cabuya cu bultonan mara na boto.
Debi cu e speedboat no kier a para, miembronan di Wardacosta a tira riba e motornan di e boto pa asina e boto a para. En total a confisca 23 bulto y investigacion a mustra cu den e bultonan tabatin 468 kilo marihuana y 104 kilo di cocaina.
Tur sospechoso ta nenga: Hues a cuminsa puntra e sospechosonan tocante e bultonan di droga. Ta asina cu J.B.R. y J.P.G ta nenga cu un di nan tabata e capitan. A.H.A. y R.J.G. ta nenga cu un di nan tabata capitan y ningun a tira bultonan di droga den laman. Hues a bisa cu ta straño pasobra Guarda Costa a mira e bultonan tabata wordo benta den laman. Segun J.B.R., el a paga pa bin Aruba pa traha pa mantene su famia na Venezuela. El a reclama cu Wardacosta a trat’e malo ora el a pidi ayudo pasobra e tabata sinti malo.
Maltrato di sospechosonan: El a bisa cu el a wordo maltrata. E otro sospechosonan tambe a bisa cu nan a wordo maltrata formal door di miembronan di Wardacosta. Hues a remarca cu mirando e situacion, por a spera cu Wardacosta lo actua pasobra e speedboat no kier a para. Hues tambe a bisa cu con por ta posibel cu tin asina hopi droga riba boto y ningun di e sospechosonan no a mira nada.
Fiscal a baha pisa: Fiscal a bisa Hues cu dia 23 Februari 2025, Centro di Informacion (CID) a notifica Wardacosta cu tin un boto di 8 meter largo a sali for di Venezuela cu hende y droga abordo biniendo direccion pa Aruba. Esaki tabata den oranan di dia y no anochi.
Wardacosta a intercepta e boto den awanan territorial di Aruba. En total 23 bulto di droga a keda confisca. Diesnuebe bulto tabata benta den laman y a recoge nan tur. Fiscal a bisa cu esaki ta importacion di cantidad grandi di marihuana y cocaina.
Fiscal a remarca cu tur cuater sospechoso ta desmenti di ta envolvi den e importacion. Ningun ta bisa kende tabata e capitan. Tur ta bisa cu nan tabata sinta dilanti den e boto. Na opinion di Fiscal, ta hopi straño cu nan tur tabata sinta dilanti y no tin capitan.
Fiscal a bisa Hues cu e no ta kere declaracion di e sospechosonan. El a mustra cu miembronan di Wardacosta a mira hendenan ta tira bultonan di droga den laman y a mira R.J.G. na e motornan. Pero awor segun e sospechosonan, ta “e miembronan di Wardacosta ta gaña”.
Fiscal ta haya nan tur ta complice di importacion di droga. Na opinion di Fiscal, e grupo aki ta forma parti di un organizacion criminal cu ta dedica su mes na traficacion di droga. Fiscal a enfatisa cu aki ta trata di importacion y no exportacion di droga. El a tuma e grupo na malo cu nan no para responsabel, pa loke nan a haci.
Fiscal a exigi pa tur cuater sospechoso 7 aña di prison. Tambe el a exigi pa e boto cu 12 jerry can di gasoline keda confisca.
Abogado: mr. Lee a bisa Hues cu tur cuater sospechoso a mustra cu nan a wordo maltrata desproporcionalmente door di miembronan di Wardacosta. El a pidi Hues pa tene cuenta cu esaki. E abogado ta haya cu e detencion ta inhusto. El a mustra cu un di nan cu a wordo malamente maltrata, no a haya atencion medico. E abogado a pidi Hues pa reduci e castigo exigi pa Fiscal drasticamente door di esaki.
- Lee a bisa Hues cu e ta haya cu no tin ningun investigacion haci pa sikiera mustra cu tin vingerprint di man di esnan abordo. El a bisa cu tabatin mas boto den vecindario y no por exclui cu otro boto lo a benta bultonan den laman. E abogado a sigui bisa cu e sospechosonan a bin Aruba pa traha pasobra nan situacion na Venezuela ta hopi malo. E ta haya e exigencia di Fiscal desproporcional.
Hues a cera tratamento di e caso y a bisa cu e ta bay studia e caso y 3 October 2025 pa 8:15 am lo tin sentencia.
